Nuevu capítulu de 'Instrumentos Tradicionales d'Asturies'

Asturies.com TV estrena'l tercer capítulu de la serie “Instrumentos Tradicionales d’Asturies”. Nésti episodiu, Lisardo Prieto, músicu de Felpeyu, preséntanos el vigulín.

Nel videu, l'instrumentista da a conocer un instrumentu que califica “olvidáu na tradición asturiana”. Esti capítulu súmase al primeru, nel que David Varela enseñó l’acordión y el segundu, onde Merce Santón dio a conocer la zanfoña.

La serie ta fecha en collaboración cola Escuela de Música La Quintana, consta de siete capítulos y ta dirixida por Javier Lueje, realizador de perconocíos videoclips como "La Saya" de Felpeyu o "Na Caleya" de La Bandina.
 
La Quintana axunta la mayor ufierta d'enseñu del patrimoniu musical asturianu. Gracies a un alcuerdu col equipu direutivu de la Escuela Pública Rei Pelayo de Xixón, la Quintana usa los locales d'esta escuela pa llevar alantre'l so llabor educativu.