Suatea convoca unes nueves Xornaes de Llingua Asturiana y Educación

El Sindicatu de la enseñanza  tien convocao pa los próximos díes 19 y 20 una nueva edición de les Xornaes  que yá desarrollara na primavera del 2008.

Les xornaes entamarán el vienres 19 de marzu nel xixonés Centru Municipal d’El Llano a les 16 hores. Darréu, a les 16.30, el director d’Hegoalde Ikastola de Pamplona, Aitor Etxarte Berezibar, ufrirá la ponencia “Tratamientu integráu de les llingües na escuela, compartir, estudiar y planificar". Depués, los profesores d’Institutu Nel Caldevilla y Xulio Berros, dos de los responsables del portal educativu "Puertu Asturies", pondrán pieslle a la primera xornada con “Recursos web na enseñanza de la nuestra llingua”.
 
Al día siguiente, sábadu 20 de marzu, la primer cita ye a les 10.00 hores, de la mano del académicu y profesor, Xosé Antón González Riaño, que falará del plan d’estudios d’asturianu en Maxisteriu. Mientres qu’a les 11.15, el filólogu Xulio Viejo fairá lo mesmo cola minor de Filoloxía. 

A les 12.45 va tratase la situación d’Entrambasuguas con “Esperiencies na clas de gallego-asturianu”, a cargu de la maestra de la escuela de Tapia, Aurora Bermúdez. Darréu, el profesor d’Institutu, Berto Cobreros Gil, ufrirá la conferencia titulada “Ente’l plan llingüísticu del centru y les cuatro parés del aula. Un cuentu, la realidá y un deséu”.
 
Les Xornaes de Llingua y Educación siguirán depués de la xinta, a les 16.00 hores, cola presentación de los nuevos llibros d'Educación Primaria, de la mano del maestru Nacho Fonseca. Siguíos de la presentación de los de secundaria, a les 17.40 y de la mano de les profesores d’institutu Paz Fonticiella y Concha Prieto.
 
A lo llargo de les ponencies de la tarde, el coleutivu Softastur tamién va entamar un taller d’Edubuntu pa profesores de Primaria y Secundaria, poniendo-y esta actividá puntu a les xornaes.

Axuntámoste más abaxo'l Programa Completu y la Fueya d'Inscripción a les Xornaes.