Fai! fixo risión de la concentración antialbortista d’Uviéu

|

La organización Fai! boicoteó la concentración antialbortista d’esti pasáu domingu, con una pancarta na que ridiculizaben les idees "reaccionaries" de convocantes y asistentes.

Un piñu de militantes de Fai! acudieron a la Plaza la Escandalera d’Uviéu con una pancarta na que se lleía “Los rrojos se comen a sus hijos. Yo lo bi” al tiempu qu’espardieron un panfletu con una introducción reaccionaria “que foi mui bien acoyida polos presentes”.
 
El testu, según indiquen, llamaba a la prohibición del divorciu, la penalización del adulteriu y del albuertu, atacábase la entrada de la muyer nel mercáu llaboral y afalagábase la sumisión a les ‘figures masculines’.
 
Esti testu, escritu en castellán, venía siguíu d'un testu n'asturianu nel que se dexaba claro que cualquier persona que tuviere por prestoses estes afirmaciones nun taba sana mentalmente, defendiendo los drechos de les muyeres y la so llibertá pa decidir sobre'l so cuerpu.
 
Según cuenten dende Fai!, “tres de munchos minutos na que la pancarta a la vista de los manifestantes nun causó nengún tipu de rocea, una docena de persones abordó a los militantes a emburriones, rompiendo la pancarta pela metá y entamando a pataes y puñetazos que torgaron la llibertá d'espresión que los presentes calteníen en silenciu”. 
 
“Esti xaréu finó nuna total confusión énte los propios asistentes, qu'entamaron a acusase unos a los otros de ser de los ‘pro-aborto’, al nun decatase de la xugada que Fai!-yos quixo facer, amosando a les clares que'l llema pretendidamente increyible nun lo yera tanto pa munchos, faltes d'ortografía incluyíes”, indiquen dende Fai!.
 
La organización afirma que quixo ridiculizar al movimientu antialbortista, “un coleutivu minoritariu, sectariu nel sen más esplícitu del términu, al que la mayoría de la población tien por aventaos y qu'anecia na doble vara de midir no qu'a la defensa de la vida se refier, pero qu'inda tien munchu pesu na sociedá pola so situación y relevancia social”.
 
Videu del actu de Fai!

Comentarios

Bones. Yo veo permal lo que fizo Fai! Acabo ver el videu y falen d'un "Actu d'estrema drecha" ¿!? Yo tuve sofitando la concentración antialbortista, y puedo dicir que soi asturianista, y pude ver una concentración pacifica de xente variao y correuta.
Parezme permal dir a un actu como esti a reventalu :( ¿Gustaríavos que vinieren eses persones a una concentración pola Oficialidá a reventala? A mi non, y lo primero ye respetar les opiniones distintes a les d'ún mesmu, esto ye ser asertivu (cosa que a ciertu asturianismu parez que-y falta muncho).
Otru puntu importante ye la "encapsulación" del asturianismu en si mesmu. L'asturianismu nun puede ser radical y aceptar namás una mentalidá radical en tolos aspeutos de la sociedá. Falé con della xente y dalgunos votaríen a un partíu nacionalista asturianu si oficial y publicamente se manifestare escontra l'albortu. L'asturianismu falla no de siempre, la política. Debemos averar a cualesquier triba de xente, siempre dentro d'un rangu acorde a principios básicos (un nazi obviamente non), y sólo así conseguiremos una representación importante que dalgún día determine un partíu políticu nel poder que declare'l drechu básicu: Oficialidá.
Ya a mena personal, valoro les coses: dalgo ta bien o nun lo ta. ¿Albortar? Si lo sopeso, ta mal (pa mi) y polo tanto toi escontra d'albortar. Dexemos de camentar en polítiques de drecha o esquierda. Cada aición política ta bien o mal pa la sociedá.
Un saludu candial.
 

Pepinast,
que seyas asturianista nun quita que seyas otres munches coses más. Hai organizaciones como "Asturies non conforme" (pues buscar per internet) que faen coses n'asturianu y eso nun quier dicir más nada. Tamién tienes al Círculu Lliberal, qu'usa l'idioma asturianu na so xera diario y eso nun tien más tresfondu ideolóxicu.
Defender l'asturianu nun te fai independentista, nin comunista nin anarquista, anque tamién ye verdá que ye más fácil ver a una organización que seya nacionalista o similar defendiendo rasgos identitarios asturianos. Y pasa lo mesmo con ser d'izquierdes (de verdá) que teóricamente tan de manera más abierta (o asina debiere ser) pola reconocencia de derechos sociales como l'idioma o esti tema de les muyeres.
Si mañana hubiere una manifestación pa refugar la sentencia del TC d'usu del asturianu yo taría mui contentu con que se fuere a protestar. Nun ye lo mesmo salir a la cai a defender un derechu (el de les muyeres, el de los falantes...) que salir pa pidir qu'otros coleutivos nun los tengan (muyeres y asturfalantes) mentres homes y castellanofalantes sí los tienen recoyíos.
Pa finar, la to percepción del mundu nun tien que ser compartida por otra persona/grupu que defenda la oficialidá. Hai coleutivos que tan en manis pola oficialidá y al día siguiente tan con otres lluches sociales (inmigrantes, soberanismu, antifascismu, ecoloxismu...) y otros que tan pidiendo incineradores, abaratamientu del despidu o la unidá sacrosanta de la nación española.
Como defensor del asturianu paezme bien que tea en cuantes más organizaciones y espacios políticos meyor. L'asturianu nun ye patrimoniu de nenguna ideoloxía. Atacar a organizaciones qu'usen l'asturianu con normalidá pa cualquier tipu de reivindicación, tresversalmente, porque nun se tea d'alcuerdo colo que faen tien otru nome.
Un saludu candial y ¡non a los antialbortistes! ¡que nun decidan por nosotres!
 

Contador Estadistiques