Areces anuncia qu'Asturies va tener esti añu la so Llei d'Igualdá

Areces anunció con motivu del Día de la Muyer, qu'Asturies va presentar esti añu la so Llei d'Igualdá. El documentu tará basáu na llei del Estáu, coles especificidades que correspuendan.

Areces prometió mientres la so intervención sacar a la lluz un borrador col máximu consensu, antes qu'acabe'l periodu lexislativu. Pa ello, el presidente apuntó que ye necesariu l'apoyu mayoritariu non solo dende'l puntu de vista institucional y políticu sinón tamién dende la perspectiva social.
  
Según esplicó'l Principáu, Areces esplicó que'l Día Internacional de la Muyer ye un compromisu añal pa reivindicar los derechos conquistaos al traviés de la historia a base de sacrificiu, d'esfuerzu y tamién de denuncia nos casos d'esa lacra que ye la violencia de xéneru.
  
Nesti sen, el presidente del Principáu felicitó a "tolos colectivos que ficieron posible la igualdá", y reivindicó "esta situación en tolos ámbitos", talos como'l llaboral, la participación social y institucional, l'educativu, la sanidá y l'intervención social.
  
Coles mesmes, recordó de manera especial a figures importantes en materia d'igualdá como Nene Losada, de la qu'añadió que desgraciadamente "nun ta con nós pero sigue na nuesa alcordanza y la nuesa memoria".