Xega recuerda la invisibilidá de lesbianes y transexuales

TríbadAS, l'Área de Lesbianes de XEGA, súmase al Día Internacional de les Muyeres baxo'l lema de la Plataforma Feminista d'Asturies, 'Les muyeres tenemos muncho que dicir'.

Según informó XEGA, nel 2010 va centrar el so trabayu en destacar y visibilizar a ún de los coleutivos más estigmatizaos, precariu nel mercáu llaboral, y que ye de continuamente blancu de la violencia estructural y machista.
  
Dende l'asociación esplicaron que "la invisibilidá de les muyeres lesbianes, bisexuales y transexuales nun se pue desvincular de la invisibilidá de les muyeres polo xeneral". Por ello, reclamen "un mercáu llaboral xustu y democráticu, albuertu llibre y gratuitu, ya igualdá efectiva ente homes y muyeres".
  
"En garrando una plena igualdá llegal, gracies a la equiparación en materia de matrimoniu y la Llei d'Identidá de Xéneru", XEGA considera imprescindible "algamar la igualdá social, algo que pel momentu queda tovía bien llueñe", según l'asociación.
 
Un añu pa "trans-formar"
  
Dende TríbadAS/XEGA reclamen la solidaridá y el compromisu de les instituciones públiques y privaes, coles muyeres transexuales, asina como de los medios de comunicación, pa lluchar contra la transfobia, la homofobia y la bifobia.
  
Les muyeres transexuales representen, según datos de la Unión Europea, ún de los coleutivos con mayor riesgu d'esclusión social y probitú. La discriminación a la que s'enfrenten nel so día a día ta multiplicada pola so doble condición de muyeres y de persones trans, lo que lleva a tases d'hasta'l 70 por cientu de desemplegu y nel casu de tar emplegáu, al trabayu precariu.
  
Nesti sen reclamen a les Alministraciones Públiques la educación como ferramienta clave pa lluchar contra'l sexismu y el machismu. Nel ámbitu llaboral apuesten por "que se garantice l'accesu al emplegu d'estes persones n'igualdá d'oportunidaes y que se sensibilice a sindicatos y empresariáu pa evitar discriminaciones".
  
Coles mesmes, piden que "s'implementen polítiques d'integración social y llaboral pa les muyeres transexuales". Amás, que les muyeres transexuales qu'entá nun rexistraron el so cambiu de nome y de sexu seyan trataes como'l restu de les muyeres a la d'aportar a los recursos públicos, como puen ser aquellos destinaos a víctimes de violencia de xéneru o a les muyeres que s'atopen en situación de privación de llibertá.
  
Tamién calquen en que "dende los medios de comunicación se dea un tratu respetuoso y oxetivu de la transexualidá ensin fomentar los estereotipos que contribúin a la estigmatización del colectivu".
  
"Un sistema sanitariu acorde coles necesidaes específiques de muyeres transexuales, lesbianes y bisexuales, y la manifestación d'una concepción más amplia de la transexualidad non cinxida a los criterios psiquiátricos", completen les reclamaciones de XEGA.