La participación nes lexislatives iraquís superó'l 55%

El voceru de l'Alta Comisión Electoral Independente iraquí (IHEC), Hamdiya al Huseini, anunció que la participación nes eleiciones lexislatives celebraes el domingu superó'l 55%.  

"Ta ente'l 55 y el 60%" afirmó Al Huseini. Les autoridaes tarrecíen una baxa participación ante l'amenaza de grupos armaos, que provocaron la muerte de 38 persones mientres la xornada eleutoral. Sicasí, paez que nun se algamará'l 70% llográu nes lexislatives d'avientu del 2005, les primeres tres la invasión estadounidense y la deposición del réxime de Sadam Husein.
  
Los resultaos oficiales nun se van conocer hasta polo menos el martes, pero dende la candidatura Estáu de Derechu, liderada pol actual primer ministru, Nuri al Maliki, asegúrase que foi la más votada en Bagdad y nel sur de mayoría chií. La Coalición Estáu de Drechu ta en cabeza en Bagdad y otres provincies del sur, afirmó'l voceru del Gobiernu y candidatu pola Coalición, Alí al Dabbagh.
  
El diputáu pol partíu Dawa d'A'l Maliki y candidatu d'Estáu de Derechu Haider al Ebadi aseguró que la Coalición va en cabeza en diez de les 18 provincies iraquís. "Estáu de Derechu ye'l primeru en Bagdad y al sur de la capital, pero'l votu especial y el del estranxeru tovía nun s'escrutó y podría alteriar el resultáu", afirmó.
  
La IHEC yá anunció que se recoyeron un total de 250.000 votos nel estranxeru, principalmente en Siria y Suecia, pero Al Ebadi afirmó que s'esperaba que los votos del estranxeru superaren el millón.
  
El principal competidor d'Estáu de Derechu pol votu chií islamista ye l'Alianza Nacional Iraquí (INA). El Conseyu Supremu Islámicu Iraquín (ISCI), integráu na INA, asegura que los primeros recuentos revelen una repartu casi equitativu del votu ente la candidatura d'A'l Maliki y la INA. El terceru sería, según estes fontes, el Movimientu Nacional Iraquí (Al Iraqiya), l'alianza llaica suni-chií encabezada pol ex primer ministru Iyad Alaui.
  
Ún de los candidatos d'Iraqiya, Thaer al Naqeeb, afirmó, pela so parte, que los resultaos nun tán claros, pero qu'A'l Iraqiya sería la formación más votada nel norte y l'oeste del país, onde collecharía ente'l 70 y el 90 por cientu de los votos.
  
Na provincia autónoma del Kurdistán Iraquí, nel norte del país, si nun se produz nenguna sorpresa, los partíos dominantes van siguir siendo'l Partíu Democráticu del Kurdistán y l'Unión Patriótica del Kurdistán del presidente iraquín, Jalal Talabani, anque sí s'espera un aumentu del apoyu a la llista Goran, d'enclín reformista.