Bloque por Asturies y PAS amosaron nel Congresu d’UNA'l so sofitu a falar sobre lo qu’une al asturianismu políticu y trabayar nun nuevu proyeutu, dexando a un llau’l pasáu.

El Voceru del Bloque por Asturies, Pablo Fernández, dixo que yera’l momentu d’entamar a fixase no que los unía, “yá qu’hasta’l momentu lo fiximos no que nos dixebraba”. Asina, faló de trabayar p’animar a la xente al traviés d’un proyeutu nuevu, ufriendo la mano a construir pontes, afirmando que lo importante son les banderes y el trabayu, “non les sigles, les persones o los cargos”, polo que dixo, parafraseando a ‘Casablanca’, que güei yera l’entamu d’una gran amistá.

Pablo Fernández recordó que fai dos décades en Xixón, Alfonso Guerra dixo nun mitín que si doblaba un mapa del Estáu pela metá Asturies y Andalucía coincidíen. Tomando les pallabres de Guerra, Fernández dixo que si coyíen los programes políticos de les organizaciones asturianistes y les doblaben pela metá coincidíen, “polo menos nun 80-90%”.
 
Mientres que’l miembru del Partíu Asturianista, Sixto Cortina, dixo que compartía l’esmolecimientu pola invisibilidá del asturianismu y que yera tiempu d’abrir un nuevu camín, “yá que les organizaciones que compartimos l’espaciu asturianista nun tenemos rellaciones cordiales”. Animando asina, a atopase y trabayar “pa construir xuntos el país”.
 
Pela parte de Los Verdes d’Asturies, Enrique Fernández, pidió cuayó pa puxar polos alcuerdos que s’algamen “p’amosar que la mayoría tien la razón y nun acabar engarrándose en caxigalines”. Mientres que Ramón Martínez, d’Unión Independiente de Carreño, dixo que lleven tres años de trabayu en común con UNA nel Conceyu, “los dos partíos somos la única oposición dientro del Ayuntamientu”.
 
De fuera d’Asturies, dende Chunta Aragonesista, Daniel Ripa dixo qu’Asturies y Aragón coincidíen en munches coses, “unes élites socialistes que lleven años gobernando alloñaes de la sociedá”. Tamién apuntó qu’Aragón acababa d’aprobar una llei de llingües, “que como pasó n’Asturies, tenemos mieu que l’aprueben pa llueu nun cumplila”. Ripa afirmó que la rellación del nacionalismu aragonés y asturianu nun yera una cuestión de votos, “básase na ideoloxía y UNA tien la capacidá de representar esi proyeutu nacionalista”.
 
Dende Aralar, Mikel Basabe, recordó que’l so partíu, enantes del so segundu congresu de 2004, namás tenía un conceyal en toa Vizcaya, pero que depués, “trabayando y apurriendo la mano fuimos medrando y anguaño tenemos representación nel Parllamentu vascu”.
 
Nel Congresu, lleron una carta de Nelly Maes, presidenta de l’Alianza Llibre Europea, qu’afitó la propuesta d’UNA d’apostar pola política municipal pa desendolcar la política nacional, “pa facer una Europa más democrática, más averada al ciudadanu”. Maes dixo que de xuru que con esi Congresu, UNA diba convertise nel referente nacionalista, progresista y ecoloxista d’Asturies.
 
Dende l’Academia de la Llingua Asturiana, Xosé Antón González Riaño, dixo que’l futuru d’Asturies depende de les decisiones polítiques “polo que dende UNA, o de cualesquier organizaciones política, planteguen alternatives de futuru tomando Asturies como exe del so llabor, va facenos meyorar como ciudadanos y pueblu, esperemos qu’estes meyores cinquen tamién a la llingua y la cultura asturiana”.
 
Dende la Corriente Sindical d’Izquierdes, María Jesús Suárez dixo que na mayoría de les lluches, el so sindicatu coincidía na reivindicación con UNA. Mientres que dende’l Belenos, Astur Paredes apuntó que cuntaran col to sofitu del so coleutivu pa defender el patrimoniu  asturianu. Per otru llau, Moisés Cima, agradeció en nome de Xeira la sensibilidá cola cultura del Navia-Eo.
 
Dende’l Coleutivu Manuel Fernández de Castro, Daniel Rodríguez animó al asturianismu a nun engarrase “cuando tenemos los mesmos oxetivos”. Del mesmu sentir foi David Rivas, de l’Asociación ’25 de Mayu’, que recordó esa fecha, “cuando los asturianos dexaron griesques a un llau y llucharon ente una agresión esterior”.
 
Dende Fai!, Denis Coria dixo sofitar la xuntanza, pero señalando qu’esta tien que venir dende la esquierda, “yá que’l capitalismu afuega a los pueblos”. Amás, nel Congresu tamién participó Softastur, la Xunta pola Defensa de la Llingua y el Conseyu de la Mocedá del Principáu d'Asturies. SUATEA y l’Asociación de Coleutivos Asturianos (ACA), qu'anunciaren la so presencia nel Congresu finalmente nun pudieron tar nél.