UNA tiende la mano al asturianismu “p’aldericar sobre’l camín de futuru”

UNA faló nel so Congresu de trabayar en común y construir una alternativa real. La organización escoyó la so nueva executiva y aprobó la so ponencia d’estatutos col 85% de los votos.

Nel pieslle del Congresu celebráu esti pasáu fin de selmana, el reelixíu Secretariu d’Organización, Roberto Holgado, dixo que la organización ye consciente del pidimientu d’unidá y nun puen mirar pa otru llau, “pa UNA ye un pegoyu fundamental, ñacimos de la xuntura”.
 
Poro, afirmó que dende güei, el so partíu tiende la mano a les demás organizaciones del ámbitu asturianista p’aldericar sobre’l camín de futuru, “dexando pa prau sigles y organizaciones, algamando un alcuerdu estable y seriu pa trabayar en común”. Esclariando que si dalquién sobra nesi proyeutu ye quien nun cree nél, “yá que la historia del asturianismu tien que valir pa nun repetir errores”.
 
Faló de camudar el panorama políticu asturianu pa caltener la identidá “y nun acabar siendo una provincia periférica”, entamando yá a sumar fuercies pa ufrir un espaciu políticu asturianu “qu’ufra una alternativa real a PP y PSOE-IU”. Señalando qu’UNA quier ser una ferramienta capaz de tresformar la realidá, “llegando a la xente que quier una respuesta al réxime de la FSA, a la xente que tien una idea nacional d’Asturies y a los que piden un discursu ecoloxista”.
 
Holgado apuntó la necesidá de reforzar l’espaciu referencial asturianu, “l’asturianismu consciente, l’ámbitu común de manifestaciones que surden d’Asturies como suxetu propiu”. Pero esclarió que pa esi espaciu tenga futuru ye necesariu construir una alternativa política real y electoralmente relevante.
 
Per otru llau, el Voceru Nacional, Faustino Zapico, faló de trabayar por un futuru meyor, “yá qu’enantes de ganar electoralmente hai que cuayar socialmente”. Falando d’una alternativa que tenga’l nacionalismu como elementu tresversal del discursu, “pa que depués del 2011 entamemos a sentir otra voz, la voz de los que quieren una Asturies más xusta y más solidaria, una Asturies que seya más país”.
 
Dixo tamién que l’espaciu políticu asturianu ye un proyeutu rexenerador ,“la política al serviciu del pueblu”, que tien qu’ufrir una alternativa a lo que nomó ausencia de modelu d’anguaño: “el tira que llibres, tenemos la tasa d’actividá más baxa de la Unión Europea, tenemos la población más avieyao, una baxa natalidá mientres la mocedá marcha pa xenerar riqueza fuera, tenemos un modelu enerxéticu que produz enerxía pa fuera y equí’l que se mueve sufre la represión”.
 
Mientres que la Vocal de la Executiva, Yolanda González, faló de lo retos d’UNA: “esistir na consciencia de la xente que ye lo mesmo qu’esistir políticamente”, esclariando qu’había que reforzar la organización nos conceyos, enanchar la militancia y facer política polos intereses del país.
 
Aprobación de la fueya de ruta
 
UNA aprobó la so ponencia d'estatutos por mayoríes superiores al 85% de la  militancia con drechu a votu. La ponencia establez como llinies estratéxiques prioritaries el trabayu nos conceyos y la creación y afitamientu nel próximu añu d'un espaciu políticu asturianu “que puea ser referencial pa tolos asturianos que piensen en clave nacionalista y asturianista, que busquen una alternativa d'izquierdes al binomiu PSOE-IU o que tengan sensibilidá ecoloxista”, indiquen dende la organización.
 
A la eleición de la Executiva presentóse una única candidatura iguada con 9 miembros, frente a los 7 anteriores. La llista presentada incorpora a 6 de les 7 persones incluyíes na Executiva anterior, a les que s'amesten el representante de les mocedaes de la organización, Belarmino Álvarez, asina como Ignaciu Llope y Carolina Díaz.
 
La Executiva caltién a los qu'hasta agora yeren Voceru, Faustino Zapico; Coordinador, Miguel Ánxel Díaz; y Secretariu d’Organización, Roberto Holgado. Repiten tamién Tino Fernández, Yolanda González Huergo y Daniel Fernández.
 
Según la Comisión Organizadora del Congresu, la llista presentada quier  da-y continuidá al llabor fechu hasta esti momentu, favoreciendo l'anovación xeneracional a traviés de la presencia d'un nuevu representante de mocedá y encontando la capacidá y la esperiencia de la organización a traviés de la incorporación d'Ignaciu Llope, “la voz del nacionalismu asturianu históricu”, y Carolina Díaz, militante en Carreño que va encontar la estaya de política municipal.
 
Pieslle con delegaciones convidaes
 
Na mañana d’ayeri, domingu 7 de marzu, UNA fixo’l pieslle del Congresu, nel qu'intervinieron organizaciones ya instituciones convidaes del campu políticu, sindical, y social. Ente los convidaos qu'intervinieron nel Congresu alcuéntrase'l Bloque por Asturies, Partíu Asturianista, Los Verdes d’Asturies, CSI, SUATEA, ACA, Xunta pola Defensa de la Llingua, Xeira, Academia de la Llingua Asturiana, Conseyu de Mocedá del Principáu d'Asturies y les organizaciones polítiques Chunta Aragonesista y Aralar.
 
Amás, nel Congresu amosaron un videu onde personalidaes del asturianismu cultural, como los músicos Xune Elipe, Llorían García, Xosé Ámbas y Miguel Fernandi, l’etnográfu Berto Peña o’l maestru X.M. García "Llábana", saludaron el proyeutu d’UNA.
 
Bloque y PAS afirmen que ye tiempu d'un nuevu proyeutu