UNA celebra'l so Congresu con mires de "sumar fuerces" pa 2011

UNA va celebrar esti fin de selmana'l so segundu Congresu, coles mires de renovar la so Xunta Executiva y articular un espaciu políticu pa conformar una alternativa asturianista.

Será una de les propuestes que los militantes de la organización debatan nel Congresu, qu'entama güei nel Auditoriu d'Uviéu de magar les 11.00 hores y va prollongase mientres tola xornada del sábadu y la mañana del domingu.

Al mesmu, van asistir convidaes más de 20 organizaciones de carácteer políticu y social. Ente elles hai delles formaciones polítiques del so entornu, como Los Verdes, Bloque por Asturies, Asturianistes por Nava, Unión Independente de Carreño y Partíu Asturianista, pertenecientes al espectru políticu verde, asturianista o d'esquierdes que la organización pretende abarcar na construcción de la señalada alternativa. Amás, va haber representantes d'otres fuerces llegaos d'otres zones del Estáu, como Aralar o la Chunta Aragonesista.
  
Fuera del ámbitu políticu, destaca la presencia d'organizaciones como l'Agrupación de Colectivos Asturianos, ACA, Fai!, Xeira, Academia de la Llingua, Xunta pola Defensa de la Llingua Asturiana o Belenos.
  
Una de les ponencies a aldericar señala que "ye necesario que l'asturianismu políticu tenga presencia institucional, con conceyales y diputaos nes instituciones asturianes con capacidá d'influyir". Afirmen que "nesi sen van trabayar cola vista puesta en 2011".  
  
UNA propón tamién l'articulación d'una alternativa de país ante un proyectu del PP y PSOE-IU, que "comparte la subordinación a un proyectu políticu non pensáu dende y p'Asturies y la so coincidencia nel modelo cultural, social y ecolóxicu".
  
Otra de les ponencies propón a los conceyos como pegoyos organizativos pa crear "esi espaciu políticu asturianu nel que'l nacionalismu seya a presentase como una alternativa homologable y normal"
  
El restu de ponencies va fixar "la postura de la organización énte diversos temes como'l mediu ambiente y el desarrollu enerxéticu, la situación llingüística, la crisis económica o l'estáu de la cultura n'Asturies. Asina, nuna d'elles critícase la xestión nesta última materia que'l Partíu Socialista ta realizando dende'l Gobiernu del Principáu.