1.600 quilómetros pa sofitar la llingua irlandesa

El próximu día 9 de marzu arrinca'l ‘Rith’ (carrera n’irlandés) que va percorrer 1.600 quilómetros ente Belfast y Galway pa consiguir fondos pa impulsar l'usu social del irlandés.

La carrera va entamar na capital d'Irlanda del Norte y pasa pela capital de la República d'Irlanda, Dublín, p’acabar el 17 de marzu, día de San Patriciu, en Galway, una de les principales ciudaes del oeste irlandés, mui cerca de les árees onde entá caltienen l'usu de la llingua. Nel testimoniu que se van dir pasando los relevistes va haber un mensaxe de sofitu a la llingua de la presidenta d'Irlanda, Mary McAleese.
 
El que quiera sofitar la carrera pue mercar quilómetros, con precios que van de los 20 a los 250 euros. El dineru que s’algame va ser ingresao nun fondu especial pa dar sofitu a proyeutos que promuevan y afalen l'usu del irlandés como llingua de la comunidá.
 
Ente les organizaciones que s'implicaron pa lluz al Rith hai delles entidaes históriques pa la promoción del irlandés, como Conradh na Gaeilge, Glor de nGael, Comhluadar, Gael Linn o Seachtain na Gaeilge.
 
El Rith coincide cola Selmana de la Llingua Irlandesa, un eventu que se celebra en tola islla y qu'axunta toa una serie d'acciones a favor del idioma célticu. Si too va bien, dientro de dos años celebrarán una nueva edición de la carrera.