Convoquen una concentración en Xixón contra Álvaro Uribe

Convoquen una concentración en Xixón contra la reeleición del presidente colombianu, Álvaro Uribe, “poles sos violaciones de los drechos humanos”.

Según los convocantes, miles de colombianos son forzaos al exiliu, millones al desplazamientu forzáu, mientres s'impón un modelu económicu qu'apina la probitú y desfai’l mediu ambiente por semes en monocultivu de palma aceitero y la minería en gran escala. Amás, indiquen que’l gobiernu d'Uribe viola a diariu'l Drechu Internacional Humanitariu venceyando a la población civil nel conflictu armáu al traviés de 'la rede d'informantes', 'soldaos por un día', 'families guardabosques', 'estudiantes informantes' y 'taxistes informantes'.
 
Señalen que la política de 'Seguridá Democrática' nun combatió a los grupos narcoparamilitares. “133 congresistes socios d’Uribe foron investigaos polos sos nexos colos escuadrones de la muerte al par de 14 exgobernadores y 35 ex alcaldes”, afirmen.
 
Indiquen que se convirtió en práctica la criminalización de la oposición política, “con señalamientos y detenciones masives de líderes sociales y defensores de los drechos humanos”. Esclariando que’l Movimientu Nacional de Víctimes de Crímenes d'Estáu vien siendo atacáu de manera sistemática por funcionarios del gobiernu, “170 agresiones ente asesinatos selectivos, desapaiciones forzaes, detenciones, amenaces y intimidaciones”.
 
Tamién afirmen que la política d'Uribe de pagar por cada guerrilleru dao de baxa, dio pie pa la comisión pol exércitu colombianu de más de 1.200 casos d'execuciones extraxudiciales de persones civiles, “a les que depués d'asesinaes antroxen de combatientes, tando los militares responsables d'estos crímenes  en llibertá ensin xuiciu”.
 
La concentración ta convocada pa mañana vienres a les 20 hores, na xixonesa Plaza del Humedal, por UGT, USO, CSI, SUATEA, Soldepaz Pachakuti, ACSUR d’Uviéu y Xixón, Ingeniería sin fronteras, Cambalache, Picu Rabicu, el coleutivu de colombianos refuxaos n’Asturies ‘Luciano Romero Molina’ y la Coordinadora d’ONGs d’Asturies.