El PP tacha d'engañu'l 'Plan A'

El PP tachó de "engañu a los conceyos" el Plan 'A', yá que según los conservadores valió pa que los consistorios tengan 5.118.886 euros menos d'inversión qu'en 2009.

La vicesecretaria de Política Territorial del PP d'Asturies, María Teresa Mallada, la vicesecretaria de Política Municipal, Isabel Pérez Espinosa, y el diputáu del Grupu Popular na Xunta Xeneral del Principáu, Ramón García Cañal ufrieron una rueda de prensa güei n'Uviéu. Los dirixentes del PP basaron les sos acusaciones en cifres de los presupuestos rexonales de 2010 y dixeron que "los fondos previstos pal 2010 y que'l Principáu vendió como adicionales, nun lo son", pues "en realidá camuflen obres que yá taben previstes".

Según consta nos presupuestos, les actuaciones del Plan A van executales les conseyeríes d'Alministraciones Públiques; Mediu Ambiente, Ordenación del Territoriu ya Infraestructures; y Cultura y Turismu.
  
No que se refier a Alministraciones Públiques señalaron que la subida real nel programa d'Obres, Servicios y Cooperación Llocal nel 2010 sobre'l 2009 ye de 21,9 millones. En Cultura y Turismu, según el PP, les inversiones nos capítulos afectaos baxen 3,9 millones, mientres qu'en Mediu Ambiente, Ordenación del Territoriu y Infraestructures caen 23,7 millones. Asina, el resultáu final de la adicionalidad del Plan 'A' "ye negativu pa los conceyos", según los populares, con 5,1 millones menos d'inversión con comparanza col pasáu exerciciu.
  
"Ye un engañu a los conceyos", señaló Isabél Pérez Espinosa, que negó "adicionalidá alguna del Plan. Son los mesmos fondos, en dellos casos menos pa los conceyos". Pela so parte, María Teresa Mallada afirmó tener la constatación de que "el Gobiernu rexonal chantaxó a los conceyos amenazándolos con nun financiar les obres si nun les pasaben nala Plan 'A'". Cargó contra los alcaldes del PSOE por "plegase a eses amenaces y ser cómplices de la situación".
  
El PP plantégase agora pidir esplicaciones sobre esti asuntu tanto na Xunta Xeneral como en toos y caún de los conceyos afectaos. "Cañal llegó a dicir que'l Gobiernu recurrió a trucos como camudar el nome de los proyectos pa que nun se note que yá taben previstos, algo qu'asocedió", dixo, "en Samartín del Rei Aurelio".