UNA y Asturianistes formalicen la so rellación al traviés d'un protocolu

Asturianistes por Nava y Unidá Nacionalista Asturiana confirmen la so rellación a traviés de la robla d'un protocolu. Amás, la organización presentó la web del so Congresu.

Nisen Díaz, en calidá de Secretariu Xeneral d'ApN y Faustino Zapico como voceru d'UNA, firmaron el llunes 1 de marzu, esti protocolu de rellación ente dambes dos organizaciones, d'ámbitu de conceyu y asturianu, col envís d’afitar de forma estable la so actual rellación tanto na política de Nava como na asturiana. “Los principios rectores del acuerdu sedrán de respetu y compromisu con unos valores y oxetivos que tanto UNA n'Asturies como ApN en Nava vienen defendiendo dende los sos entamos”, indiquen dende UNA.
 
“ApN contribúi d'esta manera a la construcción d'una alternativa política a nivel asturianu a traviés d'UNA, daqué tan importante pa que los asuntos de Nava lleguen a los gobiernos del Principáu, del Estáu o d'Europa”, señaló Nisen Díaz, qu'asegura que l'únicu enfotu d’esti pautu, ye defender los intereses de Nava a traviés d'una fuerza asturiana.
 
Tamién anunciaba la participación activa d'Asturianistes por Nava nel próximu congresu que va celebrar UNA'l día 7 nel Auditoriu d'Uviéu, con una ponencia na que s'incorporarán propuestes de política municipal d'APN y al qu'asistirán tanto Emilio Ballesteros, conceyal de l'agrupación, como'l mesmu Nisen Díaz.
 
Pela so parte Faustino Zapico, resaltaba'l trabayu lleal qu'hebo ente UNA y ApN, nel ámbitu asturianu y municipal, nos últimos años y l'interés mostráu por ApN, “tanto n'ameyorar la realidá de Nava, como en facer lo que ta na so mano pa que les mesmes meyores tengan la so plasmación en tol territoriu asturianu”. Según Zapico trátase de que los conceyales y l'agrupación d'ApN s'integren na dinámica común d'UNA y qu'ApN tenga encontu pa que la problemática de Nava tenga voz fuera del conceyu.
 
Según indiquen, UNA llogra asina una de les sos aspiraciones, “ufiertar pautos a les agrupaciones locales coles que comparte oxetivos políticos, pa ser a llevar les sos propuestes a los conceyos asturianos y trabayar por una gran plataforma asturianista y nacionalista de cara a les próximes elecciones de 2011”.
 
UNA y ApN lleven una trayectoria de dos años trabayando a comuña en temes puntuales nos que-yos axuntaben los mesmos intereses, “como na so oposición a la llinia de Soto-Penagos o la defensa del medioambiente na Comarca de la Sidra”. Dambes formaciones, que caltendrán la so identidá nos respeutivos ámbitos d'actuación, anunciaron na firma que los resultaos d'esti pautu nun se van facer esperar y que “veremos aína nuevos frutos de la collaboración que yá s'entamó”.
 
Presentación del Congresu
 
UNA ta acabantes xubir al so espaciu na rede, una web especial na que s'apurre información sobre'l II Congresu de la formación nacionalista que va tener llugar n'Uviéu los díes 6 y 7 de marzu.
 
Nel videu que yá ta disponible na web, dellos militantes, miembros de la Executiva y cargos públicos d'UNA comenten el sentíu, la función y les espectatives coles qu'UNA aporta a un congresu que, col lema "Construyendo l'Alternativa Asturiana",  supón un afitamientu en militancia, implantación, propuestes y discursu de la organización.
 
Asina, a lo llargo de cuasi 10 minutos dase-y voz a Yolanda Huergo, la vocera de la organización en Xixón, el voceru de mediu ambiente, Tino Fernández, los conceyales de Nava, Xuan Rodríguez, y Carreño, Emilio Ballesteros, el voceru d' UNA-Mocedá, Mino Álvarez, la representante de la Comisión Organizadora del Congresu, Iris Díaz, y otros miembros de la Executiva d'UNA como Daniel Fernández y el so voceru Faustino Zapico.
 
Amás na web pue alcontrase noticies, información sobre horarios del Congresu, el calendariu congresual y, nel momentu que seyan aprobaes, les ponencies polítiques y d'estatutos.