El Club Xeitu reivindica la figura de Guzmán Álvarez

El Club Xeitu de Ḷḷaciana vien de promover la revalorización de Guzmán Álvarez Pérez, figura fundamental nel estudiu del paḷḷuezu y del que se cumplen cien años del so nacimientu.

Ñacíu en La Riera de Babia (Lleón) en 1910 y fináu en Bilthoven (Holanda) en 2004, Guzmán Álvarez foi un filólogu que se doctoró cola tesis 'El habla de Babia y Laciana', dirixida por Dámaso Alonso y editada pol CSIC en 1949.
 
La obra ye una de les aportaciones fundamentales sobre la variante dialeutal de la Montaña Occidental asturlleonesa y foi un enantes y un depués nel so reconocimientu llingüísticu.

Pal Club Xeitu, Guzmán Álvarez ye l’entamador del movimientu recuperador y revalorizador del paḷḷuezu, “siendo anguaño les fasteres de Babia, Ḷḷaciana, Ribas de Sil y los conceyos llindantes asturianos, una de les zones que meyor conservaron la so llingua vernácula con infinidá d’aportaciones científiques y lliteraries”.