UNA coincide colos vecinos de Cabueñes nes alegaciones al PXOU

Yolanda González afirmó que coinciden colos vecinos de Cabueñes, en que los desendolques del PXOU nun tendríen en nengún casu formar parte de la llamada Alternativa 0.

La vocera d’UNA-Xixón esplicó que los desendolques de Bernueces y los suelos UZN-I 1 Casares-Porceyo, dos ámbitos de suelu de 100.000 m2 y 950.000 m2 aproximadamente, taríen afeutaos pola anulación del Plan Xeneral al que desendolquen per parte de la Sala de lo Contencioso Alministrativo del Tribunal Superior de Xusticia d'Asturies. “Tal paez que, una vegada más, el Conceyu quixo xugar de tafuru colos xixoneses, tentando colanos daqué per aciu d'un documentu manifiestamente nulu ya irregular”, declaró la vocera.
 
UNA recueye nes alegaciones presentaes al documentu de prioridaes, la mesma argumentación que planteen los vecinos de Cabueñes, diciendo que “magar que l'anulación del Plan Xeneral Municipal d'Ordenación se recurriere en casación per parte del Conceyu y heba que tase a lo qu'a resultes del procedimientu se derive, el propiu Tribunal Superior llegó a afirmar que la declaración de nulidá d'un Plan Xeneral Municipal d'Ordenación, como ye'l casu, en cuantes xerárquicamente superior, determina la nulidá del planeamientu que s'apruebe en desendolque del mesmu, y ello a pesar de que la declaración de nulidá del plan nun seya firme y que se recurriere en casación”.
 
Ello determina según González, que “los planes parciales definitivamente aprobaos en desendolque del mesmu, nun habríen que se considerar na alternativa cero” polo que los datos que d'ellos remanecen, como yá se recoyía igualmente nel documentu d'alegaciones ,“nun habríen tomase como puntos de partida incontestables, sinón que nel so casu, fadríen parte de les previsiones de medría del futuru plan”.
 
“Mal principiamos cuando nel primer documentu pal alderique del nuevu plan s'entama con irregularidaes d'esta mena. Como planteamos nes nuestres alegaciones, el documentu falsia'l debate, darréu que parte de datos erróneos y contién previsiones absolutamente descontestualizaes colo que ye imposible que podia haber un procesu tresparente y participativu. Cuando nel primer pasu yá entamamos asina, daquién habría asumir responsabilidaes" remató Yolanda González.