Irlanda alvierte del peligru que suponen los grupos escindíos del IRA

El ministru de Xusticia irlandés, Dermot Ahern, alvirtió que los disidentes del IRA son un riesgu igual d'importante qu'el que suponíen mientres la época más violenta del conflictu.

"L'amenaza nesta isla ye tan alta como mientres los Problemes", dixo en referencia a la época más violenta del conflictu d'Irlanda del Norte, ente les décaes de 1960 y 1980.  
 
"Nun pienso que tea creciendo l'apoyu col que cuenten. La información que tenemos ye qu'estos grupos, especialmente l'IRA Auténticu y l'IRA de Continuidá, tán realizando un esfuerzu nos últimos meses pa un averamientu, paez qu'hai una fertilidá cruciada", afirmó Ahern en declaraciones a la radio pública irlandesa, RTÉ. "Ye un enclín esmolecedor porque claramente ta creciendo la so capacidá", alvirtió.
  
Ahern recordó que dende setiembre rexistráronse 13 incidentes d'importancia. Una comisaría de Craigavon, al oeste de Belfast, sufrió un ataque anueche con un morteru y el pasáu llunes un coche bomba españó ante un tribunal de Newry -sur del Ulster-, anque en nengún de los dos casos hubo firíos.
  
Estos grupos tamién reivindicaron l'asesinatu d'un home en Co Derry esta mesma selmana. El calabre de Kieran Doherty alcontróse nuna cuneta cerca de la ciudá de Derry. La selmana pasada llogróse atayar un atentáu con morteru contra una comisaría de Keady y en marzu dos militares británicos morrieron asesinaos en Co Antrim. Dos díes depués del ataque contra'l cuartel de Massereene, mataron a un policía en Craigavon.
  
Ahern aseguró qu'estos grupos "tán intentando provocar a les fuerces de seguridá britániques" y algamar qu'alcen el nivel d'alerta de seguridá. "Lo que tán intentando ye que vuelva l'Exércitu a les cais d'Irlanda del Norte y desestabilizar los esfuerzos de les fuerces polítiques pa trayer una paz definitiva al Norte", dixo.