Suatea diz que’l ‘pautu educativu’ va aceptar les demandes del PP

Suatea diz tarrecer que’l ‘pautu educativu’ estatal, acabe llindándose a la “mera aceptación de les demandes del Partíu Popular y per ende de la xerarquía católica”.

Según el sindicatu, da más cancha a los conciertos educativos, “incluyendo a los centros alcordaos nel “serviciu públicu d'educación” en pretendíu planu d'igualdá y previendo claramente l'aumentu de los módulos de conciertu”. Ente la propuestes del PP, tamién dicen atopar l’usu “demagóxicu” de temes como l'autoridá del profesor, l'usu de la llingua castellana o los currículos básicos de ciertes materies.
           
Según Suatea, col pautu, foméntase la competitividá ente los docentes en llugar de la cooperación., “nun modelu de xestión que venceya incentivos económicos cola supuesta meyora de la práctica docente, propiu de la empresa privada y non de los servicios públicos, nos que la so eficacia ye más que duldosa”.
 
Amás, apunten que nun se contempla nenguna midida con respeutu al profesoráu, nin se ve nada nuevo d'infantil y primaria, nin midíes pa fomentar la coeducación.
 
Dende Suatea dicen echar en falta midíes que puen contribuyir a la meyora de los niveles de calidá de la educación, ente les que señalen, un verdaderu compromisu económicu y d'aplicación inmediata, l'amenorgamientu de les ratios en tolos niveles educativos y la potenciación de too tipu d'equipos y midíes d'atención a la diversidá, con especial incidencia na detección temprana, l'aumentu y estabilidá de les plantiyes, garantizando la permanencia de cada docente na so plaza, evitando la movilidá forzada, la cual ta ente los planes del ministeriu. Amás de “la verdadera reconocencia de la función docente”, nuna retribución económica suficiente y non xerarquizada y un estable plan de xubilación anticipáu, “qu’apurriría amás el beneficiu de remocicar les plantiyes”.     
 
Del mesmu mou, piden garantizar la formación, tanto previa al desempeño como mientres la vida profesional, “con ufiertes programaes y de calidá, “empobinaes a les funciones que se van a desempeñar, de baldre y n'horariu llaboral, que nun seyan un meru preséu na meritocracia”.