De ser padres neofalantes a tener fíos falantes patrimoniales

Un importante acontecer ta teniendo y tendrá l’asturianu nestos años que parez pasar ensin un decatamientu de la so relevancia. O a lo menos ensin qu’haya un reconocimiento valoratible pola so importancia pal futuru de la llingua.
 
La mio xeneración, aquella que rondamos, con xenerosidá hacia arriba o abaxo, los trenta años, na que no llargu de la década del 2000 nos ficimos y maduramos como activos políticos o sociales pal asturianismu, la que medró baxo les corrientes habíes ente’l segundu Surdimientu y lo que dalgunos yá denomen como’l post-Surdimientu, la que s’averó al conocimientu de la llingua a traviés de l’actual y daquella recién estrenada normativa del asturianu, ta afrontando o ceo afrontará, mayormente, la cuestión de la paternidá. Esta xeneración d’asturianistes componémosla, nun porcentaxe peraltu, lo que los teóricos llamen neofalantes y afrontamos el fechu de que la nuesa descendencia algame como patrimonial la nuesa llingua.
 
Siempre habrá escepciones de persones nesta xeneración que puedan considerase como falantes patrimoniales. Sicasí, la mio opinión, basada nuna percepción soxetiva de les mios vivencies d’estos años, dizme qu’una amplia mayoría debería ser considerada neofalante. Tampoco se darán los primeros casos de padres neofalantes que faigan de los sos fíos falantes patrimoniales. Sicasí, y equí ta l’enquiz, esta xeneración diferénciase a otres anteriores no bayuroso y númberoso de la so fechura y por tanto na cantidá de casos que van repetise y quiciaves yá puedan analizase, por daquién espertu, como una nueva realidá qu’acontez pa la llingua: el fechu de qu’una xeneracion padres y madres neofalantes, seguramente la mayor de toles xeneraciones de neofalantes habíes hasta agora, fairán de la so descendencia falantes patrimoniales.
 
El trabayu dende la transición de los mayores del asturianismu tuvo ente los sos frutos la implicación numberosa de la mocedá n’Asturies nos años a los que me refiero. Pesie a que too puede ser mui meyorable, nun hai dubia del puxu cultural qu’apurre esta xeneración a Asturies, teniendo’l mayor protagonismu na música y lliteratura o na aparición na escena política de delles organizaciones onde’l pesu de la mocedá ye l’encotu d’elles o na importancia de la existencia de la Xunta Pola na qu’esta xeneración, de puertes pa fuera, parez fundamental nel so facer. Podríen sumase más llogros d’esta xeneración: Softastur y la blogosfera son buenos exemplos d’actualidá, la esistencia de diarios dixitales sustentaos mayormente por persones d’estes edaes, una importante variedá d’asociaciones culturales estraes per toa Asturies… Son munchos los exemplos que pueden sorrayase.
 
D’esta xeneración dalgunos yá somos y otros sedrán los pas y mas d’anguaño. Con ello tócanos la responsabilidá de facer el mayor actu pa la supervivencia de la nuesa llingua: tresmitila xeneracionalmente. Pero nun nos engañamos, la corriente, como con tolo que cinca pa cola llingua, ta a la nuesa contra: la inmersión llingüística na llingua española pa un neñu o neña ye total, anque pue haber diferencies bultables ente unos conceyos y otros. N’Avilés, el mio conceyu, la situación de la llingua ye más que llamentable. Si la normalización del asturianu ye la que toos conocemos, la llingua pa estes edaes, cuando tien presencia, ta arrequexada nos mayores de los ridículos, amás que los prexuicios alimentaos pol españolismu se perpetúen y tresmiten xeneracionalmente, faciendo d’ella pa un neñu o neña daqué llonxano, ayeno, fuera de lo normal. Cualquier padre y madre, al mio xuiciu, debemos de tener nidio que la nuesa responsabilidá pa cola llingua nun pue enfrentase cola mayor responsabilidá hacia la educación intelectual y formativa de los nuesos fios, qu’abarca milenta campos nos qu’hai que tar al altor que se requier.
 
Tenemos que poner de la nuesa parte, tenemos que tresmitir la llingua a la nuesa descendencia pero hai que tener procuru pa nun trespasar la que dacuando sedrá la fina llinia de la irresponsabilidá y llegar al estremu d’alterar con esta cuestión la socialización y la correcta marcha de los nuesos fios na etapa infantil y preadolescente.
 
Tamos ataos de pies y manes, sigue faltando’l componente políticu pa facer del asturianu daqué normal, mientres esto nun pase solo podremos ufrir-yos la llingua pal so deprendimientu, pal so querer y ufierta-yos requexos onde pueda usase. Ye fundamental la esistencia de debuxos doblaos al asturianu, nesti sentíu solo tenemos la esperiencia de Teleasturias nel doblaxe d’El Faru d’Iyán, ye fundamental el trabayu fechu por Enrique Carballeira, al que nun tengo’l gustu conocer, nel so Asturtoons y tolo que se ta asoleyando nesi sen y dalgunes otres iniciatives. Pero falta más, muncho más que nun depende de nos: una TPA con una programación infantil n’asturianu o un braeru programa na educación primaria pal desendolque de la llingua sedríen claves. Pero ye volver a lo mesmo: voluntá política. Mentantu, solo’l nuesu voluntarismu fairá sobrevivir la que ye la mayor de les nueses ayalgues como pueblu.