“La FSA quier treslladar que’l pautu col asturianismu ye un sometimientu, quieren desestabilizar al Gobiernu al final de la llexislatura”, señaló’l Bloque en referencia a la incineradora.

El Bloque por Asturies amosó güei en rueda de prensa’l so refugu a la construcción d’una incineradora en Serín, onde tuvieron presentes los miembros del partíu con cargos nel Principáu; el direutor de l'Axencia Asturiana de Cooperación y Desarrollu, Rafael Palacios, el direutor de l'Axencia Asturiana pa la Discapacidá, Javier Antuña. Amás del diputáu na Xunta Xeneral, Roberto Colunga, el voceru nacional, Pablo Fernández y el conceyal de Samartín del Rei Aurelio, Manuel Benayas.
 
El Bloque quixo amosar con esta representación de la organización, “una oposición en tolos ámbitos d’aición política que tenemos”, amás d’esclariar que la decisión de construyir la incineradora será una decisión de la parte socialista, “que’l Bloque nun comparte”.
 
La organización camienta que’l Gobiernu nun plantea nenguna incineradora, yá que nun se recueye esi tema nel pautu, “habría que plantease quien tendría que salir del Gobiernu”, apuntó Rafa Palacios, qu’esclarió qu’hasta que nun se ponga la “primera piedra” de la incineradora, el Bloque va siguir nel executivu.
 
Pal sociu d’IU, l’alderique sobre la incineradora de Serín, ye una tema que nun toca anguaño: “quien quiera facer una incineradora que lo ponga nel programa eleutoral pal 2011”, dixo Palacios, sentenciando que ye un tema que nun ta recoyíu nel pautu de Gobiernu, “los que tán faciendo de Gobiernu y oposición ye la FSA, nun somos nós”.
 
“Paez qu’equí tamos dispuestos a tragar con tolo que nos echen, con esi tamañu, paez que pretenden quemar la basoria de tol norte d’España”, afitó Palacios, pal que too esto forma parte de la falta de respetu al mediu ambiente y de la falta de proyeutu de país.
 
Palacios señaló qu’anguaño tán utilizándose cuestiones polítiques de “fondu caláu” pa resolver problemes internos d’organizaciones, “si los partíos nun tienen claru quienes son los sos candidatos nun puen desestabilizar al Gobiernu y a la sociedá asturiana con alderiques que nun toquen”, apuntó.
 
El miembru del executivu dixo que los socialistes tán a la escontra de la incineradora n’otros llaos, como en Castellón. Amás, falo de que’l fechu qu’esistan incineradores en munches comunidaes autónomes nun quier dicir qu’esto seya bono, “paez que namás queremos importar lo malo, tamién n’otros llaos tienen drechos llingüísticos y equí non”.
 
El diputáu del Bloque, Roberto Colunga, dixo que la incineradora, “que quier imponer la FSA”, ye un grave atentáu pa la salú de los asturianos, que va destruir recursos y ye incompatible con programes de reciclaxe. Pa Colunga, la incineradora nun va acabar con nengún vertederu, “va xenerar dos más pa recoyer les escories y la povisa”.
 
Según el Bloque, los que defenden la incineradora lo tán convirtiendo nun “tema de perres”. Sicasí, señalaron que va destruyir el trabayu que xeneraría’l reciclaxe, amás de que va costar 250 millones d’euros, “que van pagar los ciudadanos vía tarifa a partir de 2016”, apuntó’l diputáu.
 
Roberto Colunga tamién dixo que los puntos del alcuerdu de gobiernu referentes a la xestión de residuos, como aumentar la recoyida selectiva o educar a la sociedá sobre’l reciclaxe, “tán toos por facer, tienen que cumplise y dexar de mentir a los asturianos”.

Poro, el Bloque va entamar una campaña pa que la xente conoza los efectos de la incineradora, “trabayando nel Parllamentu, nel Gobiernu y nos Ayuntamientos”. Amás, quieren algamar una respuesta unitaria y coleutiva de toles organizaciones y movimientos sociales a la contra de la incineradora, “vamos llamar a la movilización social y que se faiga pagar el mayor coste políticu a los representantes políticos que defenden la incineradora”.