Democracia y Ayuntamientos

“Los conceyos como pieza básica de la democracia, necesiten una actualización de la so financiación y de la so regulación”
 
Los conceyos asturianos lleven munchu tiempu pidiendo un cambiu fondu na so financiación, asina como una actualización de la normativa que rixe'l so funcionamientu. Estes vindicaciones cayeron en sacu rotu, pero lo que nuna dómina de crecimientu yera una necesidá, nun periodu de crisis ta convirtiéndose en dalgo inaplazable.
 
Ye evidente que con un déficit crónicu, por mor de la falta de fondos pa encarar les sos competencies, esti modelu sólo tien un final posible; la quiebra técnica del sistema municipal asturianu. D’ello son conscientes tolos partíos políticos parllamentarios d'Asturies, pero naide plantega alternatives a esta situación, yá que desgraciadamente nel Principáu sigue primando l'interés partidista énte l’interés xeneral, como se demostró na paralización de la reforma del Estatutu d'Autonomía, pieza decisiva na meyora de la financiación de la Comunidá Autónoma.
 
Los Ayuntamientos son una institución básica na prestación de servicios a los ciudadanos, polo que necesiten urxentemente una xuba nos sos recursos, pero tamién tenemos que ser conscientes de qu'una xestión tan cercana al ciudadanu puede convertilos nuna fonte d'amiguismos y corrupción, xenerando una gran frustración a una ciudadanía que ve que nun s'atienden les sos necesidaes demientres que s'afronten gastos innecesarios.
 
Por ello, ye tan importante dotar económicamente a los conceyos como garantizar la correcta xestión de los mesmos, impidiendo que s'usen escontra l'nterés xeneral, emplegando criterios caciquiles orientaos a favorecer a sectores que garanticen la reelección de los gobernantes. Pa ello fai falta que la democracia dexe de ser un términu vacíu y camude nuna práctica que impregne'l día a día na toma de decisiones.
 
Si queremos unos ayuntamientos democráticos ye necesario articular mecanismos de participación ciudadana y de control directu de la xestión pública per parte de la ciudadanía. Nesti sen, sería clave la puesta en práctica del presupuestu participativu, yá que la distribución de los fondos públicos ye'l principal mecanismu d'orientación de les polítiques y la mas eficiente ferramienta que los ciudadanos tienen pa controlar la xestión municipal.
 
Los presupuestos participativos nun son más que formes de participación ciudadana directa na xestión de les ciudaes y pueblos, pente medies de la que puede abrise la posibilidá de participar a toles y tolos vecinos na ellaboración del presupuestu municipal. Ente les ciudaes que tan aplicando esti tipu d'esperiencies podemos atopar exemplos como’l de Sevilla, Tudela, San Sebastián, Getafe o Córdoba, colo que cuntamos con esperiencies bastantes como p’aplicar estos mecanismos nos conceyos asturianos, ensin qu’esto seya adentrase n'aventures estrañes.
 
Hai dixebraes metodoloxíes pa la so aplicación y anque nun ye esti'l meyor mediu pa comentales, si recomiendo al llector interesáu nesta temática que consulte les esperiencies realizáes nel estáu español en www.presupuestosparticipativos.com. Lo que tien de sorrayase son los oxetivos básicos que persigue'l presupuestu participativu: que la ciudadanía seya partícipe nel día a día de les decisiones que l’afecten, colo que se consigue una implicación muncho mayor nos oxetivos que se plantega una ciudá o pueblu, al sentise corresponsables dello.
 
Anque a munchos políticos-yos cueste entendelo, esti tipu de propuestes permiten alcontrar soluciones a munchos problemes al “aprovechanos” de les idegues de la ciudadanía que, en dellos casos, pueden ser la rempuesta pa munches de les situaciones coles que nos atopamos nos conceyos. Tamien ye detacable qu'estos procesos meyoren la comunicación y solidaridá ente los ciudadanos, yá que van a permitinos conocer de primer mano los problemes de colectivos y persones mas allá de les idegues preconcebíes que toos tenemos sobre ciertes cuestiones.
 
Una oportunidá perdida p’aplicar criterios de participación ciudadana foi'l Plan E, unos ingresos estraordinarios pa los ayuntamientos que podíen invertir “no que quixesen” dientro d'un ámbitu d'actuación bien ampliu. La urxencia por mazcarar los datos del paru imposibilitó l'establecimientu de mecanismos que permitieren conocer qué prioridaes teníen los vecinos pa invertir eses perres, privando a los ciudadanos de poder mostrar la so opinión na xestión d'unos fondos públicos que pa nada influíen nel funcionamientu diariu de la vida del conceyu.
 
El resultáu ta a la vista equí mesmo, en Xixón, y provocó non poques muestres d'indignación, yá que se dexó d'atender a necesidaes que munchos creíemos prioritaries p’acometer obres difícilmente xustificables. Reformes inxustificables como les de l’Acerona o pavimentaciones antiestétiques en barrios como'l de Cimavilla, ponen otra vuelta enriba la mesa la pregunta de si los poderes públicos atienden a les necesidaes de los sos votantes o a intereses estraños que naide conoz. Con actuaciones opaques y en munchos casos incomprensibles, acentúase'l desgaste de les instituciones democrátiques y con él aumenta'l desprestixu de la clase política. Va siendo hora que la ciudadanía llevante la voz escontra esta forma d'entender la democracia.