El Comité d’Empresa va concentrase “contra los despidos na RTPA”

El Comité d’Empresa convocó güei a les 19 hores énte la Xunta Xeneral, una concentración “contra los despidos na RTPA”. Amás, UNA vien d’amosar el so sofitu a los trabayadores.

Tres nun poder facer una fuelga güei  “poles alvertencies de la empresa de declarala illegal por un problema de plazos”, el Comité d’Empresa cuenta anunciar nel menor tiempu posible los otros díes de paru, “col mesmu motivu polos que se convocaren enantes; contra los despidos na RTPA”.
 
Represalies a los trabayadores y privatización de la RTPA
 
Unidá Nacionalista Asturiana quier amosar el so encontu y solidaridá col trabayador de la TPA despidíu en “circunstancies duldoses” y criticar el modelu de xestión de la mesma.
 
Pa UNA, el despidu recién d'un trabayador, perteneciente al sindicatu CSI, por motivos duldosos, “amuesa qu'una vegada más el Gobiernu asturianu interpreta los servicios públicos d'Asturies como la so empresa particular”.
 
La organización amuesa la so molición pola aplicación d'una política llaboral, “que perxudica a los trabayadores de la RTPA, aprobez la pluralidá informativa al empar que privatiza'l sector audiovisual públicu a favor de porgüeyos particulares, con subcontrates o participación privada na RTPA como ye'l casu de la RPA”.
 
Miguel Ánxel Díez, Coordinador d'UNA, diz que “ye preocupante la represión de los trabayadores na RTPA cuando simplemente esixen los sos drechos llaborales” y amiesta “nestos momentos la RTPA ye'l reflexu d'unos pocos, nun ye la televisión de los asturianos”.
 
UNA esixe al Principáu que cese nes sos práctiques de “privatización de la RTPA, de represión llaboral a los trabayadores y que xestione la entidá pa que seya un mediu públicu, abiertu y arriquecedor de la cultura asturiana”, apunten.