Suatea celebra en marzu les II Xornaes Llingua y Educación

|
Concentración escolarización asturianu

Suatea va celebrar en marzu les II Xornaes Llingua y Educación, onde van analizar les titulaciones universitaries d’asturianu o les posibilidaes del software llibre pa les clases de llingua.

Les xornaes entamen el 19 de marzu nel xixonés Centru Cultural d’El Llano a les 16 hores. Darréu, a les 16.30, el direutor d’Hegoalde Ikastola de Pamplona, Aitor Etxarte Berezibar, ufrirá la ponencia “Tratamientu integráu de les llingües na escuela, compartir, estudiar y planificar. Depués, los profesores d’Institutu Nel Caldevilla y Xulio Berros pondrán pieslle a la primera xornada con “Recursos web na enseñanza de la nuestra llingua”.
 
Al día siguiente, el 20 de marzu, la primer cita ye a les 10.00 hores, de la mano del académicu y profesor, Xosé Antón González Riaño, que falará del plan d’estudios d’asturianu en Maxisteriu. Mientres qu’a les 11.15, el filólogu Xulio Viejo fairá lo mesmo cola minor de Filoloxía.
 
A les 12.45, va tratase la situación d’Entrambasuguas con “Esperiencies na clas de gallego-asturianu”, a cargu de la maestra de la escuela de Tapia, Aurora Bermúdez. Darréu, el profesor d’Institutu, Berto Cobreros Gil, ufrirá la conferencia titulada “Ente’l plan llingüísticu del centru y les cuatro parés del aula. Un cuentu, la realidá y un deséu”.
 
Les Xornaes de Llingua y Educación siguirán depués de la xinta, a les 16.00 hores, cola presentación de los nuevos llibros de primaria, de la mano del maestru de primaria Nacho Fonseca. Siguíos de la presentación de los de secundaria, a les 17.40 y de la mano de los profesores d’Institutu Paz Fonticiella y Concha Prieto.
 
A lo llargo de les ponencies de la tarde, el coleutivu Softastur tamién va entamar un taller d’Edubuntu pa profesores de primaria y secundaria, esti última pondrá-y el pieslle a les xornaes.

Contador Estadistiques