Anxo Lorenzo en La Felguera

Anxo Lorenzo preséntanos el so primer trabayu en solitariu, “Tirán”, el sábadu 27 a les20.15 nel Nuevu Teatru de La Felguera. Inspiráu nun llargu viaxe musical que lu llevó a conocer mil llugares y melodíes que compartir con músicos de distintes naciones. Un viaxe que siempres empieza y termina en Galicia.
 
En “Tirán”, Anxo Lorenzo vuelve poner a prueba les llendes de la gaita y los suyos propios pa facenos creer que too ye posible na música. Cola producción de Pedro González y acompañáu de la so banda, formada por Xose Liz (bouzouki), Milla (percusiones), Begoña Riobó (violín), Álvaro Iglesias (Contrabajo) y l'apocayá incorporáu violinista Irlandés Eoghan Neff, amuésanos dolce temes que caminen ente la composición y la tradición, ente les ríes gallegues y el mar d'Irlanda.
 
Una amuesa de virtuosismo y sensibilidá por partes iguales que se ve incrementada coles collaboraciones de la famosa gaiteira de Northumbria Kathryn Tickell, les cuerdes de Pancho Álvarez y Luis Peixoto, Roi Adrio cola percusión, la zanfona de Anxo Pintos, l'acurdión de Jorge Apuertes o'l grupu d'estética Hindú Om/Off.