El .cat yá tien más de 40.000 dominios

La Fundación puntCAT superó los 40.000 rexistros, lo que supón una medría allegada al 20% respeuto al añu 2008. El dominiu facturó un millón d’euros a lo llargo del añu pasáu.

La fundación, ñacida nel añu 2005 coles mires de desenvolver la sociedá de la información y la conocencia nel ámbitu catalanofalante, vivió una etapa de medría continua dende los sos anicios.
 
Salvador Alegret, presidente de la fundación, señaló esti martes nuna rueda de prensa nel Institut d'Estudis Catalans, que “pasemos un periodu d'afitamientu del .cat, pero agora ta normalizáu dientro del ámbitu llingüísticu y cultural catalán”.
 
Jordi Iparraguirre, direutor xeneral de la organización, remarcó que ye fundamental crecer con sentíu dende'l primer día. “.cat dio más importancia a la calidá qu'a la cantidá del so productu, una medría controlada de los usuarios acaba apurriendo ventayes pal dominiu y pa la comunidá,” añadió. Amás, mentó la importancia que la marca fáigase visible na cai, yá que la identifica y supón que la empresa ta utilizando les ferramientes del dominiu.
 
Iparraguirre señaló que los tres exes principales de la medría de .cat son “la escelencia empresarial, con una medría allegada al 20% y una anovación superior al 80%, una facturación superior al millón d'euros mientres el 2009, un control del gastu que supunxo 130.000 euros de beneficios y una creciente espansión nel mundu de les PYME”.
 
Amás, afitó'l so lideralgu mundial y demostró la so solvencia, depués de consiguir beneficios per cuartu añu consecutivu que se reinvierten en rebaxar los precios del serviciu y ameyoralo tecnolóxicamente.