Suatea diz “tarrecer” que CCOO y UXT apoyen una reforma llaboral

Suatea considera que la movilización de güei nun se pue quedar namái na protesta contra’l retrasu de la xubilación, “yá que ta ehí la posible reforma del mercáu de trabayu”.

Suatea afirma que la crisis ye la escusa perfecta pa precarizar más l'emplegu y empeorar les condiciones llaborales, “mientres, y magar la crisis, bona parte de la gran empresa y especialmente la banca siguen publicando datos qu'indiquen importantísimo beneficios, gracies, en bona parte, a la inyeición de dineru públicu”.
 
Pal sindicatu, los gobiernos fáen-yos el trabayu puercu a les élites económiques ya intensifiquen el procesu d'esmantelamientu del estáu del bienestar y los servicios públicos al traviés de la privatización, “lo que supón una rebaxa de la calidá de los servicios básicos”.
 
Camienten que la consideranza del serviciu públicu como gastu al qu'hai qu'aplicar drásticos recurties, “ye una gran oportunidá de negociu pa la empresa privada, que va llograr asina pingües beneficios gracies a los erarios públicos y l'amenorgamientu de la calidá nos servicios esenciales a la sociedá”.
 
Según Suatea, pa ocultar esto, emplégase la estratexa de facer creer a la opinión pública que los servicios públicos nun mengüen en calidá con estes polítiques. “Ye más, sémase'l tracamundiu pretendiendo faer creer que les empreses privaes son ufierta pública en sigo mesma, como asocede n'Asturies cola rede concertada d'educación, que ye presentada como parte de la rede pública”, señalen.
 
Afiten que con too, dende CCOO y UXT, van cediendo “convencíos por esti discursu”. Suatea diz tarrecer que los sindicatos mayoritarios acaben roblando una reforma llaboral “que va perxudicar notablemente los derechos llaborales”.
 
Pa finar, esclarien que van siguir oponiéndose a estes polítiques y van siguir defendiendo los intereses de los trabayadores, pa lo que van convocar les movilizaciones que seyan afayadices.