Cospedal asegura que nun se trató con Cascos la so posible candidatura

La secretaria xeneral del PP aseguró que la direición nacional del partíu nun caltuvo nenguna conversación col  Francisco Álvarez-Cascos sobre la so candidatura.

María Dolores de Cospedal dixo que si l'ex vicepresidente del Gobiernu español va presentase a la presidencia del Principáu, ye una cuestión que van decidir los populares asturianos en collaboración col PP nacional.
  
En rueda de prensa güei en Madrid, a Cospedal entrugáron-y si Cascos treslladare a la direición nacional del so partíu un interés por volver a la política n'Asturies. "Nun tuvimos nenguna conversación nesi sen, de nengún tipu", respondió la secretaria xeneral.
  
De Cospedal nun quixo dar la so opinión sobre la posibilidá de que Cascos seya a lo último candidatu y insistió en que'l PP nacional nun trató la cuestión. "Nun tuvimos nenguna conversación", repitió. "Nun pueo interpretar por qué salió esa noticia o dexa de salir. Será'l PP d'Asturies, en collaboración col PP nacional, el que decida quién ye'l candidatu al Principáu", atayó.