Muerren polo menos 21 civiles tres un bombardéu de la OTAN n'Afganistán

Unos 21 civiles morrieron y once foron firíos ayeri nel sur d'Afganistán, por mor d'un bombardéu de la OTAN contra tres autobuses nos que sospechaba la presencia d'insurxentes.

L'incidente prodúxose nel marcu de la 'Operación Moshtarak', la ofensiva que lleva a cabu la OTAN contra los talibán na provincia de Helmand. La muerte de civiles tornó nún de principales puntos de discutiniu ente'l Gobiernu afganu y les fuerces estranxeres implicaes n'operaciones contra los talibán.

Un voceru del Ministeriu del Interior, Zamari Bashary, indicó que 21 civiles morrieron y once resultaron mancaos, incluyíos muyeres y neños, a causa del bombardéu. La ISAF abarruntó la presencia d'insurxentes en dellos vehículos civiles y bombardiólos, declaró Bashary. Coles mesmes, el presidente del conseyu provincial de la provincia onde sucedieron los fechos, (Uruzgán), Amanulá Hotak, declaró a Reuters que los civiles viaxaben en tres microbuses pel distritu de Char Cheno.
  
Pela so parte, la Fuerza Internacional d'Asistencia a la Seguridá (ISAF) informó nun comunicáu que los civiles morrieron nel momentu que s'averaben a una posición conxunta de la OTAN y del Exércitu afganu en Uruzgán, pero nun precisó la cantidá de víctimes.
  
"Dexé claro a les nueses fuerces que tamos equí pa protexer a la población afgana y que causar la muerte o firíes de manera involuntaria a los civiles mina nuesa credibilidá y la confianza na nuesa misión", declaró'l comandante de les tropes internacionales n'Afganistán, el xeneral estadounidense Stanley McChrystal, nun comunicáu de la ISAF. Abrióse una investigación, añadió'l comunicáu.