Mieres acueye la gala del Premiu al Meyor Cantar 2010

Brandal, Dixebra, Lafu&Rebeca, Misiva y Xera son los cinco grupos que van competir mañana pol Premiu al Meyor Cantar y la representación d'Asturies nel Liet International.

Brandal ye una formación nueva de Cangas del Narcea, que practiquen un estilu de folk melódicu apegáu a la tradición. Canten n’asturianu occidental y ente los sos componentes figura’l cantautor Pedru Pereira. Brandal trabaya fundamentalmente cola música del suroccidente. Participen na gala col tema “Chueve”, del so primer discu “Na fonte La Canalina”, onde la voz tien una presencia bien destacable, con lletres tradicionales, del propiu Pedru Pereira o de la escritora Eva González.

Los históricos del rock n’asturianu Dixebra, participen col cantar “El dinamiteru”. A lo llargo de los casi 25 años d’esistencia siguen fieles a facer  rock mestizu reflexando nes sos lletres la realidá social d’Asturies. Nos sos testos tienen collaborao dellos de los meyores escritores actuales en llingua asturiana, casu de Xandru Fernández, Quique Faes, Pablo A. Marín Estrada o Pablo Texón. Tienen publicaos diez discos, el cantar col que participen pertenez al so caberu trabayu, “Amor Incendiariu”.
 
“El mio sitiu”  ye’l cantar col que participen Lafu&Rebeca, dúu artísticu, formáu por Rebeca Velasco y Alejandro Lafuente. La primera dirixe delles agrupaciones corales asturianes y actúa davezu como cantante llírica; el segundu ye profesor de guitarra en delles escueles municipales. Tienen grabaos tres discos, nel l’últimu, “Nun pido más”, muévese nel estilu avezáu de la canción d’autor, con pincelaes funky y jazzera. Los testos son obra de Lafu, y tienen toos ellos un carácter intimista y personal.
 
Misiva surde nel añu 2007 en Grau como un grupu punk-rock directu, potente y reivindicativu. Nel 2009 punxeron na cai la so primer grabación, un discu de cinco canciones onde muestren tol potencial del so estilu. Esti trabayu presentábase en formatu doble, con un discu coles lletres de les canciones cantaes n’asturianu y otru con elles en castellanu, una filosofía que quieren siguir nel futuru. “La casa’l mieu” ye’l cantar que van interpretar na gala.
 
Xera ye un grupu de folk electrónicu. El so estilu surde, precisamente, de la combinación d’elementos electrónicos con instrumentos acústicos como’l buzuqui, el violín o la gaita. El so oxetivu final ye intentar fusionar estes dos corrientes aparentemente distintes. Tienen publicaos dos discos onde desenvuelven el so discursu musical. Nel últimu, tituláu Tierra, inxértase’l cantar del mesmu títulu, col que participen nel Premiu.
 
El “Premiu al Meyor Cantar” nació nel añu 2007 como reconocimientu a la creación musical en llingua asturiana. Acordies coles bases, puen optar a esti galardón les canciones con lletra n’asturianu que foran comercializaes ente’l 1 de xineru y el 31 d’avientu del 2009, siempre que seyan obres musicales de creación orixinal. Na presente edición, cumplíen estos requisitos un total de 106 temes interpretaos por 21 grupos o artistes.
 
La Gala d’Entrega del Premiu al Meyor Cantar va celebrase’l sábadu 20 de febreru nel Auditoriu de la Casa de Cultura Teodoro Cuesta de Mieres. La hora pa empezar ye a les 19.00 hores pero pa favorecer el desenvolvimientu de la Gala nun se va permitir la entrada de públicu a partir de les 18.50 hores. La entrada ye llibre hasta completar un aforu de cerca trescientes butaques. Nel trescursu de la Gala, que va tar conducida polos escritores y presentadores Vanesa Gutiérrez y Naciu Varillas, los cinco grupos finalistes van interpretar los cinco cantares qu’opten al premiu.
 
El turonés Alfredo González, como ganador de l’anterior edición del Premiu al Meyor Cantar, va dar un conciertu acompañáu de la so banda. Depués va dase a conocer el fallu del xuráu y los ganadores van volver a interpretar el cantar premiáu. La TPA emitirá allanzada la gala, el próximu domingu 21 de febreru, a les 21.30 hores.
 
Asturies.com tien abiertu un Conceyu Abiertu onde los llectores puen votar pol so candidatu, pel momentu encabeza la llista "El dinamiteru" de Dixebra.
 
Consuelo Vega presenta los nominaos al Premiu al Meyor Cantar