La Coordinadora d'Estudiantes asume la protesta contra Aznar

La Coordinadora d'Asamblees d'Estudiantes asumió la protesta contra Aznar. Del mesmu mou, Darréu fixo un llamáu a movilizase contra “cualesquier otra espresión de facismu”.

La Coordinadora d'Asamblees d'Estudiantes de la Universidá d'Uviéu llamentó que'l PP y el so "prepotente líder pretendan dar lleiciones de moralidá dempués de cometer ún de los mayores xenocidios na historia del Estáu español". El colectivu, qu'axunta a miembros de la comunidá universitaria, señaló los sos oxetivos son "la defensa d'una Universidá crítica y responsable cola sociedá que la arrodia, asitiando los drechos humanos y l'educación pública nel exe del so discursu".
 
Al so xuiciu, "los causantes de la guerra d'Iraq nun pueden pretender realizar impunemente lleiciones morales sobre política, ético o respetu social". Amás llamentó que "la prepotencia d'Aznar, manifestada nel xestu dirixíu al conxuntu de los estudiantes de la Universidá d'Uviéu, reflexa l'escasu respetu d'esta persona a la crítica y a la vida humana".
 
Dixeron que los estatutos de la Universidá d'Uviéu, "establecen qu'ésta defende la paz, refuga la guerra y la investigación con fines bélicos, polo qu'Aznar nunca debió pisar el recintu universitariu". "Nun pue ser que los causantes de muerte y destrucción puean exercer el drechu a la llibertá d'espresión, mientres que los que defendemos la vida, la llibertá y la paz tengamos que permanecer impasibles", argumentaron, "insistiendo en que la protesta foi cívica y pacífica y que foi la seguridá privada del actu la qu'exerció la violencia y llendó l'accesu al actu a estudiantes de la Universidá".
 
Solicitaron amás responsabilidaes polítiques al rector de la Universidá d'Uviéu y al decanu de la Facultá de Ciencies Económiques y Empresariales por ceder los espacios universitarios, "ensin nenguna consulta al coleutivu d'estudiantes, a persones alloñaes del ideal de convivencia, pacifismu y ética moral d'una institución de más de 400 años d'historia".
 
Darréu califica de "facista español" a Aznar
 
Pela so parte, Darréu fixo un llamáu a la mocedá a siguir movilizándose escontra Aznar o cualesquier otra espresión de “facismu español”. Del mesmu mou que califiquen como falta de respetu el xestu col deu haza los estudiantes,  “amosando la so gran educación, prepotencia y actitú chulesca”, señalen dende la organización.
 
Darréu señala que na conferencia impartida pol “fascista” Aznar en dengún momentu se falara d’Asturies. Señalen que namás tuvo pallabres pa España y p’afirmar qu’el únicu sistema económicu válidu ye’l capitalista y que la integridá territorial del estáu ye incuestionable.
 
Amás, critiquen que Gabino de Lorenzo, pidiera-y a Delegación de Gobiernu que tome medíes escontra los estudiantes, “pol cenciellu fechu d’espresar la so opinión y refugar a un provocador, a un facista español”.
 
Darréu diz que yá tán fartos de que líderes políticos vengan al nuesu país a imponemos el so discursu y les sos grandes idegues diseñaes dende Madrid “que nun son válides pal pueblu asturianu”.  “Porque con esta lamentable forma d’actuar siguen amosando’l despreciu y la falta de respetu que tienen p’Asturies y pal pueblu asturianu”, apunten.