Xixón siguirá pola capitalidá europea "con o ensin Uviéu"

|

El conceyal de Promoción Económica de Xixón llamentó que l'alcalde d'Uviéu quiera descolgase  de la candidatura a capital cultural europea de 2016 y aseguró que "la intención de Xixón ye que'l proyeutu siga alantre con Uviéu o ensin Uviéu".

José María Pérez llamentó que "siempre seya dende'l mesmu sitiu dende onde se traten de descolgar les iniciatives nes que se trata de trabayar n'equipu y n'andecha". El conceyal realizó estes declaraciones a entrugues de los periodistes tres la rueda de prensa na qu'informó de los asuntos aprobaos pola Xunta de Gobiernu celebrada güei nel Conceyu.

Afirmó que Xixón tien "menos población que delles ciudaes europees o del Estáu, que fueron o aspiren a ser sede d'esti tipu d'eventos pero", aseguró, "nun hai nenguna candidatura qu'axunte les cualidaes de les tres ciudaes asturianes n'ufierta cultural y d'ociu". Dixo Pérez que ye una llástima que nun se quiera trabayar n'equipu pa reforzar esa cercanía y tresmitila al esterior.
  
José María Pérez apuntó que "ye una pena que dalguién por intereses partidistes intente separase del proyeutu o cuestionalu dende dientro". Destacó que nun hai sitiu pa "facer de 'quintu columnista' y intentar boicotiar el proyeutu dende dientro, porque los conceyos participen dende dientro nes actividaes rellacionaes con esta iniciativa".
 

Contador Estadistiques