Zapatero ofrez a los partíos axustar un acuerdu de cuatro puntos

El presidente del Gobiernu ofreció a los partíos nel plenu del Congresu axustar un alcuerdu económicu sobre cuatro puntos que tendría de roblase nun plazu de dos meses.

Pa ello, designó una comisión encabezada pola vicepresidenta segunda del Gobiernu, Elena Salgado, y los ministros de Fomentu y Industria, José Blanco y Miguel Sebastián, respeutivamente.

Zapatero, qu'aseguró que va dar la máxima relevancia a esti asuntu, plantegó acuerdos en cuatro puntos: midíes p'ameyorar la competitividá de la economía española y fomentar la creación d'emplegu; política industrial pa promover l'anovación del modelu productivu; cumplimientu del plan de consolidación fiscal p'asegurar l'amenorgamientu del déficit públicu y la reforma del sistema financieru (estabilidá, morosidá y accesu al creitu).
  
Según dixo, los trés ministros van ser "los responsables de poner tola carne nel asador pa llegar a acuerdos" y, pa ilustrar la so voluntá d'acuerdu. Declaróse amás abiertu a tratar otros temes o abrir nuevos enfoques sobro los temes propuestos y convidó a tolos voceros a plantegar les sos propuestes nel alderique que ta teniendo llugar nel plenu.
  
El xefe del Executivu fixó'l plazu p'algamar los acuerdos en dos meses: "les reformes nun se puen retrasar", avisó, añadiendo que'l procesu de diálogu, "sobremanera teniendo en cuenta que va ser al máximu nivel operativu, nun se puede caltener indefinidamente".
  
Nesti sen, alegó que la tramitación del proyectu de Llei d'Economía Sostenible, p'acordar los temes nél conteníos o p'abrir a otros nuevos, "establez un marcu, el parlamentariu, y un horizonte temporal, el de la tramitación llexislativa, qu'encamienta a roblar los acuerdos nun plazu non superior a los dos meses".
 
Reformes operatives enantes de xunetu
  
Zapatero precisó amás que la so intención ye que'l conxuntu de les grandes reformes tean operatives primero que concluya esti primer semestre, tanto les midíes sometíes a consensu xeneral como les que siguen un calce específicu --reforma llaboral--.
  
El xefe del Executivu almitió qu'algamar esos alcuerdos nesi plazu "ye un retu pa tolos partíos", pero remarcó que "ye lo que demanden los ciudadanos y pidió pa ello superar rocees, conciliar ambiciones llexítimes, aceptar soluciones parciales y aprovechar toles capacidaes del país".
    
Amás, sorrayó que la so apellación al esfuerciu colectivu y l'ufierta de voluntá lleal d'acuerdu "nun va implicar que'l Gobiernu arrenuncie a les sos facultaes nin faiga dexación de les sos responsabilidaes, sinón que ye un esfuerzu de sumar a toos al esfuerzu pola recuperación".