Areces repite que l'AVE del Cantábricu nun ye prioritariu

Areces aseguró que l'AVE del Cantábricu ye un tema recurrente y que nuna época de restricción de gastu y d'esistencia d'otres prioridaes nun ta en primer llínea de les sos necesidaes.

El presidente del Principáu realizó estes declaraciones a entrugues de los periodistes, en rematando la intervención del ministru de Política Territorial, Manuel Chaves, nel Buró de la Conferencia de Rexones Perifériques Marítimes.

Areces apuntó qu'hai que tener procuru col estudiu ambiental porque Asturies tien una rasa mariñana bien estrecha, que yá ta travesada per víes de comunicación como l'Autovía del Cantábricu, qu'afecta a munches esplotaciones ganaderes de toa esa zona.
    
Anque ta incluyíu nel PEIL, el presidente asturianu afirmó que nunca lo punxeron ente les sos prioridaes. Afirmó que n'España tol mundu ye consciente güei de qu'hai que mirar como muncha eficiencia'l gastu públicu en tolos niveles de l'Alministración.
    
Vicente Álvarez Areces manifestó que "l'aspiración ye acabar l'AVE radial con Madrid, un asuntu", dixo, "nel que'l Ministeriu de Fomentu apoya". Repitió que tien "plena seguridá de que los plazos van cumplise". Coles mesmes refirióse a les grandes autovíes pela mariña y l'interior y destacó la importancia que tien la so acabación pal Gobiernu rexonal.