UXT y CC.OO van manifestase contra les propuestes sobre pensiones

UXT y CC.OO axuntaránse'l día 17 pa concretar les aiciones y presentar la manifestación que se va celebrar n'Uviéu'l 23 de febreru, a les 19.00 hores, contra la reforma de les pensiones.

El Comité Estraordinariu d'UXT Asturies analizó güei'l documentu del Gobiernu sobre revisión del Pactu de Toledo y espresó'l so refugu a les propuestes dirixíes a la Comisión parlamentaria de siguimientu del Pactu, que ta encargáu d'analizar el Sistema de la Seguridá Social.
  
Na resolución del Comité, UXT Asturies considera que gran parte de les reflexones y propuestes del Gobiernu "son desacertadas, tanto pola elección del momentu, como pol procedimientu y el so conteníu". "Oponémonos a cualquier midida que suponga un amenorgamientu na cuantía media de les pensiones y un endurecimientu de les condiciones a la prestaciones. En particular, nun compartimos midíes como la elevación de la edá llegal pa la xubilación hasta los 67 años, nin les relatives al periodu de cálculu de les pensiones", afirmaron dende UXT.
  
Asina, el sindicatu aprobó entamar de manera inmediata una campaña informativa pa esplicar a los trabayadores, en centros de trabayu y empreses, la posición del sindicatu ante la propuesta gubernamental sobre reforma de les pensiones, y sobre les alternatives sindicales p'asegurar la sostenibilidá y viabilidá del sistema.
  
A xuiciu del sindicatu, de llevase a la práctica les propuestes del Gobiernu, supondríen "rebaxes na cuantía media de les pensiones de los trabayadores y un endurecimientu de les condiciones d'accesu a les prestaciones del Sistema Públicu".
  
UXT Asturies tamién fizo referencia na so resolución al mercáu de trabayu. El sindicatu considera que "la contratación indefinida ye la meyor garantía p'amenorgar les inaceptables tases de temporalidá, la descausalización del despidu y la segmentación del mercáu de trabayu, amás de ser la meyor contribución a la meyora de la productividá y competitividad de les empreses".