Fai! califica de positivu’l balance de los fechos de Llanera

Fai! valora como positiva l'actividá y esperiencies desendolcaes nestes últimes selmanes en Llanera, señalando que na concentración del sábadu participaron unes 40 persones.

Recuerden que la convocatoria foi convocada al ser refugaos los permisos pal usu d'espacios públicos y “vergoñosamente vulneraos los drechos llingüísticos de les asturianes y asturianos prohibiendo l'usu del idioma propiu nes comunicaciones cola alministración”.
 
Dende la organización cuenten que la convocatoria cuntó col repartu de cientos de panfletos y “énte'l ruíu de los chiflos que s'espardieron ente los presentes”. Al tiempu, los ciudadanos de Posada y Llugo de Llanera recibieron nel so buzón un panfletu nel que Fai! desplicaba pasu a pasu “la discriminación que dellos de los sos militantes tuvieren que soportar nel conceyu gobernáu pol Partido Popular”.
 
Nesti sen, la pegada d'un cientu de cartelos en Posada y Llugo, “arrancaos poles brigaes de llimpieza ordenaes pa tal fin n'esclusiva”, y el buzonéu de 2.000 panfletos puerta a puerta “son un ésitu de por sí, reblagando les llendes de los medios de comunicación de mases y llegando a informar a la población del proceder neglixente de l'alministración del so conceyu”.
 
Señalen la importante acoyida de la movilización na prensa asturianista y la “probe pero real” repercusión nos medios de comunicación asturianos en castellán, “lo que pa esta organización tamién supón el llevar la nuesa reivindicación a espacios menos avezaos”.
 
Fai! quier agradecer otra vuelta a tola riestra d'asociaciones, organizaciones y persones del ámbitu que se punxeron en contautu, “al traviés d'una montonera de correos lletrónicos, mensaxes nes redes sociales o de manera personal, pa tresmitinos la so indignación énte los fechos y amosando la so solidaridá pa con cualquier violación de derechos llingüísticos asemeyada”.
 
Dende la organización señalen que siguirán puxando pa consiguir que los espacios públicos de Llanera dexen de tar secuestraos pol equipu de gobiernu, pola llibertá d'espresión y escontra la represión llingüística “que vien careciendo toa aquella y aquel que quiera espresase nel idioma del so pueblu”.