SOS Racismu diz que Bienestar Social "criminaliza" los inmigrantes

|

La organización acusó a Bienestar Social de llevar a la marxinalidá a mozos que queden na cai "ensin documentación y acosaos pola Policía".

En rueda prensa, la lletrada Ana Taboada refirióse en concreto al casu de dos mozos, orixinarios de Marruecos, a los que tres residir n'Asturies espulsáronlos del país por nun tener la docuentación en regla. Al so xuiciu, el Gobiernu ta collaborando coles fuerces del orde y actúa "con prexuicios y sin motivación".
  
El primeru de los casos ye'l d'un menor que llegó nos baxos d'un autobús dende Marruecos y cursó n'Asturies estudios de soldadura. Colos años, l'Alministración, en llugar de face-y una cédula que permitiere tramita-y la residencia llegal, "espulsólu de la rede deproteición de menores non acompañaos y dexólu na cai". Tres andar al debalu per Avilés y Uviéu, "detuviéronlu un día antes de que llegaren los sos papeles a Marruecos", y espulsáronlu en base a unes pruebes ósees, según les que tenía 18 años o más.
  
Según informó Ana Taboada, el mozu tornó a España sólo una selmana depués debaxo d'otru autobús y "el día que-y diben entregar el pasaporte deportáronlu otra vuelta". Pa la representante llegal de SOS Racismu, les alministraciones públiques competentes "nun lu documentaron como yera obligao", y el so pasaporte, que diz que nació en payares de 1992, continúa nel Consuláu Marroquín d'Algeciras, a la espera de que lu deporten.
  
L'otru mozu permaneció internu nel centru penitenciariu de Villabona mientres cinco meses, pese a ser menor d'edá. Dempués, unviáronlu a un centru de Valencia dende onde lu espulsaron a Marruecos. El mozu tornó a Asturies, onde al mínimu error abriéron-y un nuevu procedimientu d'espulsión.
  
Asina, detuviéronlu en Xixón, onde permaneció una fin de selmana nos cuarteles, ensin que l'abogada recibiere información sobre la so situación nin sobre los motivos de la detención. Nesti momentu, atópase en Madrid, a la espera de la deportación.
  
Pa Itxaso Aguirre y Ana Taboada ambos casos ponen de manifiestu qu'esiste un especial asañamientu contra los inmigrantes y que lo único que fizo la Conseyería ye centrase nes males conductes y nun faer nada por documentalos, como ye la so obligación.
  
Van Siguir cruciando la frontera nos baxos de camiones hasta que-yos fáigan casu en dalgún sitíu. "Tán emponiéndo-yos a la marxinalidá", sorrayaron. Coles mesmes, consideraron que'l procesu biolóxicu y verbal del menor ta tovía en formación y nun se pue equiparar la so actitú a los deberes de l'Alministración.
 
Escesiva privatización
  
Per otra parte, llamentaron que se "privatizare de forma descomanada la proteición de los menores non acompañaos n'Asturies". Nesti sen, esplicaron que se los deriva a centros privaos onde nun se los entemez con asturianos nin mozos d'otres nacionalidaes colo que se potencia la so supuesta conflictividá.
  
Amás criticaron el protocolu del Proyeutu Ícaro de preparación a la vida adulta, pol que se-yos mete en pensiones y contrólaselos de forma periódica pente medies d'educadores d'Organizaciones Non Gubernamentales. "Son menores y precisen un acoyimientu integral", reivindicaron.
  
Pa SOS Racismu, "les Instrucciones de la Direición Xeneral del Ministeriu del Interior tán llevándose n'Asturies al pie de la lletra y acabaron nuna fola de represión descomanada per parte de la Policía Nacional, que detién a tou ciudadanu que-yos paeza sospechosu pol so color de piel".

Contador Estadistiques