Ensin novedá nes pantalles d’Asturies

En poques selmanes finará l'apagón analóxicu, con una cobertura de TDT qu’algama’l 97,5% d’asturianos. Sicasí, vemos como nenguna nueva canal entamó les emisiones.

El Gobiernu asturianu ta realizando campañes pa informar a la población sobre la TDT y el procesu d’adaptación que finará'l dos d'abril, col apagón analóxicu final. Pero mientres los asturianos yá tán preparaos pa recibir la señal dixital, vemos como les canales de televisión a los que’l Principáu concedió-yos llicencia nun entamaron o emitir. Pa Xabel García Pañeda, profesor d’Inxeniería Telemática de la Universidá d’Uviéu, el Principáu permite que nun faigan nada. “LNE tien munches concesiones y nun fai nin amagu pa entamar les emisiones. Eso quier dicir que nun ven viabilidá económica”, señala.
 
Foi a entamos del 2007 cuando’l Gobiernu concedió les llicencies, que foron de dos tipos; d’ámbitu autonómicu y local. De les cuatro llicencies autonómiques que’l Principáu podía conceder, decidió guardar dos pa la TPA y otra pa que l’alministración ufiertara servicios interactivos. Mientres que la única llicencia concedida foi pa Localia, quedando Teleasturias ensin llicencia y viéndose obligada al pieslle.  Pa García Pañeda que la TPA tenga dos entra dientro de lo normal, “casi toles autonómiques lo fixeron pa tener dos canales desincronizaos onde pudieran meter más conteníos si un día dase la ocasión”.  
 
Sobre acutar una señal pa servicios interactivos diz que ye dalgo que fixeron en otres munches comunidaes, “lo que pasa ye que ye una situación ensin sustancia en cuanto que va a tardar munchos años n’usase. Los equipos que compramos los usuarios nun valen p'acceder a esos servicios”.
 
Mientres que nes siete demarcaciones nes que ta dixebráu’l país (Avilés, Cangas de Narcea, Xixón, L’Infiestu, Llanes, Ḷḷuarca y Uviéu), el Principáu axudicó tres llicencies, algamando Editorial Prensa Asturiana frecuencies en toles demarcaciones, mientres qu’El Comercio TV va emitir nes tres principales ciudaes asturianes. El restu foron pa empreses como Canal 48 Occidente, Oviedo Televisión o TLG. Una concesión de llicencies que pal profesor de la Universidá d’Uviéu foi un desastre, “sobre too porque sacaron 25.000 llicencies locales y solo una autonómica”
 
Sicasí, pasaos yá tres años del anunciu de concesión de frecuencies pol Conseyeru d’Economía y Alministración Pública, Jaime Rabanal, nada cambió nel panorama audiovisual asturianu, polo menos nun cambió pa meyor.
 
Localia, la que diba ser la canal autonómica privada, dexo d’emitir, TLG peslló y Teleasturias, a la que nun se-y dio llicencia, dexo d’emitir. Xabel García Pañeda señala que tán condenaes a la desapaición la mayoría de les televisiones locales. “Según yo lo veo hai mercáu pa una televisión más, amás de les españoles y la RTPA, con cobertura autonómica. Nun hai puxu pa más”, sentencia.