Xurde Blanco critica la falta d'asturianistes en Llanera

Xurde Blanco, depués d’asistir a la concentración convocada por Fai!, califica de cainismu que l’asturianismu nun tuviera presente denunciando una "faltona discriminación llingüística":

L’asociación Fai!, convocó ayeri delantre del Ayuntamientu de Llanera una concentración por mor de que’l Conceyu-yos vien negando l’usu de la Casa la Cultura. Na última amás, la Conceyala de Cultura y Muyer, Belén Lopéz, esixo-yos presentar l’escritu en castellán.
 
Pa Xurde Blanco, lletráu del Principáu y Secretariu del Aconceyamientu de Xuristes pol Asturianu, tres acudir al actu, diz que nun s’entiende “qu’ente un fechu d’esa triba, grave y qu’humilda a toos, se dexe sola a la víctima, si nun ye al traviés del llinguax foín col que s’escribe la mísere historia del cainismu”.
 
El xurista diz que la hora y el día yeren amañosos, un sábadu a les 12.30 hores, pero que nun vio presente a nengún representante de les fuercies polítiques del asturianismu, “nin siquier, lo qu’entá ye peor, de les milenta organizaciones cíviques, institucionalizaes o non, del mesmu o asemeyáu calter”.
 
Según Xurde Blanco Puente, too esto ye "un camín a nenyuri". Quien si tuvo foi IU, sicasí, el secretariu de Xuristes pol Asturianu, señala que nun toma por asturianista o nacionalista a esti partíu políticu.