Berto Peña: “La política cultural asturiana ye d’un despotismu total”

Alberto Álvarez Peña (Salas, 1966) ye un conocíu etnógrafu, autor d’obres sobre mitoloxía y tradición oral. Asturies.com fala con él sobre la situación de la cultura y d’Asturies en xeneral.

Yes miembru del Conceyu d’Estudios Etnográficos Belenos. ¿Pienses qu’esti coleutivu cumple unes funciones que tendríen que corresponde-y a instituciones como la Universidá o’l RIDEA?
 
Pues sonar presuntuosu, pero sí. L’añu pasáu hubo un congresu de tradición oral na Universidá y una de les coses que dixeron los sos miembros, yera que n’Asturies la etnografía taba en manes d’aficionaos. Con esto reconocíen que taben faciendo dexadez de funciones. “Belenos” cubre un güecu qu’hasta la fecha naide atendía, amás de que lo facemos n’asturianu, lo que supón un soplu d’aire frescu. Tamién tal RIDEA, pero sabemos lo acartonáu que ta y los problemes que tien cola llingua.
 
En payares del añu pasáu Belenos empobinó en La Puela, como ye vezu, el Seminariu d’Estudios Asturianos, onde se faló de la “idea d’Asturies”, ¿qué conclusiones salieron de toles ponencies?
 
Fiximos un repás político-social sobre la idea de país que tuvieron los diferentes gobernantes y el camín per onde va Asturies. Hubo una primer idea d’Asturies como entidá con Pedro de Silva, exemplu ye que dende’l “Asturies, Paraisu Natural” nun hubo más proyeutos pal país como entidá y con perspectives de futuru. Hubo ocurrencies, como’l Petromochu de Vigil. Tenemos una clase política encastrada, qu’amás nun conoz la tierra y la xente que representen, ye urxente la renovación.
 
Nel últimu númberu de la revista “Asturies”, editada por Belenos, faes una comparanza de la mitoloxía asturiana con otres d’Europa, ¿hai dalgún elementu que seya únicu de la nuesa mitoloxía?
 
Esi númberu de la revista ye monográficu sobre mitoloxía, precisamente recueye les actes del seminariu de La Puela dedicáu a esi tema. La nuesa mitoloxía ye mui rica, única en nomes de los personaxes, pero ye una mitoloxía panaeropea. Asturies nun ye una islla, ye un vasu comunicante con otros pueblos. Hai mitos que vienen, por exemplu, del Camín de Santiago, llueu hai otros que son comunes de tola cultura occidental. Son mitos propios, pero comunes a tol mundu.
 
Nesi grupu, entraría tola mitoloxía popularizada por Hollywood en películes de mieu, de la qu’Asturies tien les sos propies versiones. Por exemplu, la guaxa como muyer vampiru.
 
Nun ta mui clara la identificación de la guaxa con esa representación, Aurelio del Llano nun topó nenguna representación de la guaxa como una vieya con un canín solu. La guaxa ye’l nome que-y dan a la curuxa, lo que pasa qu’esi páxaru bebe sangre, y si tiramos p’atrás, nel mundu romanu, vemos que les bruxes tresformábense en gatos prietos o curuxes pa facer maldaes. La guaxa en si paez ser una bruxa tresformada que tien el so orixe nes strick, la bruxa llatina. Nun tola mitoloxía vien del mundu celta.
 
Va poco espublizasti un llibru sobre cuentos colloraos, ¿ye la nuesa tradición más picantona qu’otres?
 
Dalgunos de los cuentos yá apaecen recoyíos nel “Decamerón”, munchos son del Sieglu d’oru… Lo que si notes ye que’l pueblu asturianu tien muncha más facilidá pa cuntar estes histories que’l castellán. Amás ves que cuanto más mayor ye’l que lu cuenta más gochona ye la historia. Yo alcuérdome de neñu en Salas, cuando tabes por exemplu na esfoyaza, la xente más grande cuntaba cuentos colloraos, pero como yeres neñu y teníen un doble sentíu nun t’enterabes de nada. Otra cosa curiosa ye que nestos cuentos la muyer siempre sal bien parada, el que sal escaldáu ye’l maríu o’l cura.
 
¿A qué se pue deber esa temática tan recurrente del cura nos cuentos colloraos?
 
Yera una forma de ridiculizar y criticar el poder qu’había d’aquella, pero tamién de constatar lo que pasaba. Nel sieglu XVI yera increyible’l númberu de fíos de cura qu’había n’Asturies.
 
¿Y recoyendo estos cuentos topasti dalgún relatu onde se falara de práctiques sexuales non mayoritaries?
 
Tema lésbicu o homosexual nun hai, tampoco tríos. Home, hailos d’una que lo fai col sacristán, col cura, col obispu y col maríu, pero por separáu. El tema de muyer con muyer enxamás nun apaez na tradición oral, lo que si esiste ye’l “maruxu”, l’homosexual afemináu, que nun yera un personaxe marxináu, aceptábase como yera, non la so sexualidá, pero si la so forma de ser. Tamién ye verdá qu’esti tipu de personaxes nun se comíen “un colín”. Davezu yeren xente bastante folixera, qu’organizaben la puya’l ramu, la romería…
 
Yes el presidente de l’asociación Arribada, ¿qué novedaes va tener la edición d’esti añu?
 
Va haber en setiembre un noyu central d’actividaes, demientres una selmana en Xixón, pero a lo llargo d’ocho meses vamos organizar otres coses. Vamos mover l’Arribada per Asturies, cosa que yá fiximos l’añu pasáu en Villaviciosa con bastante ésitu, onde vamos repetir. Tamién cuntamos facer dalgunes actividaes nun conceyu del occidente, quiciabes en Tapia. Vamos facer coses a lo llargo del añu, anque l’Arribada en si, como alcuentru lliterariu, siguirá siendo en setiembre en Xixón.
 
¿Qué te paez la política arqueolóxica del Principáu?
 
Pues tienes que nun van dar más perres pa siguir coles escavaciones de La Carisa, permiten un parque eólicu en Carondio, hai castros que s’esfarrapen, destituyen a Pepe El Ferreiro por que nun-yos ríe les gracies, ye un despotismu total. Nun interesen les escavaciones de La Carisa, agora quieren sobredimensionar la romanización d’Asturies. Enxamás nun se negó que’l país tuviere romanizáu, pero paez que quieren trayer el Coliséu. L’arqueoloxía equí son puñalaes traperes, finánciense unes escavaciones en detrimentu d’otres con un clientelismu total haza la política. Amás,  hai un despreciu de los yacimientos. Da igual la so importancia, importa más el lucru de cuatro individuos y puen llantar un parque eólicu o ampliar una cantera, esfarrapando con Cellagú, Carondio o’l Castru de Cabezón.
 
¿Esto que te paez que ye más pol simple lucru o tien detrás querer desaniciar la propia identidá como país?
 
Tampoco podemos falar d’una conspiración xudeo-masónica, pero ye nidio que la identidá propia molesta. Cuando les señes d’identidá tán arraigaes la sociedá nun calla coles “llendes urbanes” o cuando se planten una multinacional equí cuatro díes, esfarrapen con too y llueu marchen. La sociedá con raigaños fondos esixe coses, poro, val más crear una sociedá aborregada y ensin capacidá d’analís. La mayoría de responsables que tuvo esti país, dende l’alministración local a l’autonómica, namás tuvieron y tienen intereses personales, muévense pol lucru, pero tamién por un gran desconocimientu ya inorancia de la cultura propia.