Air Europa anuncia cuatro vuelos diarios a Madrid dende'l ún de xunu

|

Air Europa va conectar Asturies con Madrid a partir del próximu ún de xunu con cuatro vuelos diarios, colos sos correspondientes regresos, de magar les siete de la mañana.

El preciu establecíu pal primer día d'esti serviciu ye nestos momentos, según la web de la entidá, de 67 euros, subiendo hasta los 97 euros pa la mayoría del restu de feches yá a la venta.
  
Asina lo anunció'l presidente del grupu turísticu Globalia, Juan José Hidalgo Acera, que dio una rueda de prensa xuntu al presidente del Gobierno Asturianu, Vicente Álvarez Areces, p'anunciar oficialmente la próxima puesta en serviciu d'esta conexón aérea. El xefe del Executivu autonómicu yá anunciara, na so última visita a la feria de turismu Fitur, en Madrid, contautos cola compañía que daríen resultaos nes selmanes vinientes.
  
Los horarios del nuevu serviciu, que s'une a los que yá ufierta Air Europa a Tenerife Sur, La Palmes, Lanzarote, Fuerteventura, Palma de Mallorca y Mahón, van ser dende l'aeropuertu de Santiagu'l Monte: 7.00, 11.45, 16.15 y 20.00. En sen contrariu, los despegues van ser a les 9.15, les 14.30, les 18.00 y les 21.45 hores. En palabres d'Hidalgo, con estes frecuencies ufiertamos un serviciu casi completu con otros vuelos internacionales de la mesma Compañía, que dende Madrid viaxen a distintos puntos, principalmente d'América Llatina.
    
En referencia a los precios de los billetes, Hidalgo matizó: "nun venimos tirar los precios, como algunos qu'ufierten vuelos por diez euros. Nun tenemos eso en mente. Somos una compañía competitiva, con aviones modernos y muncho más cómodos", señaló, matizando qu'el que va unir Asturies y Madrid va tener 122 places y, como'l restu de la flota de la compañía, va ser un avión nuevu, "salíu de fábrica".
  
Areces mostró la so satisfaición pola firma d'esti alcuerdu que, como recordó'l presidente, zarrárase en Fitur "dándomos la mano". Dende'l so puntu de vista, la nueva conexón de Air Europa va ufiertar "una sana competencia que va beneficiar a los usuarios", en referencia al actual monopoliu que la compañía Iberia caltién nes conexones cola capital.
    
Areces aprovechó pa destacar la evolución de les ufiertes de conexones aérees nel aeropuertu d'Asturies. Asina, matizó que mientres nel 2004 namás había dos destinos nacionales y tres internacionales, nel 2010 operen ocho compañíes con doce destinos nacionales y seis internacionales, "lo que mos asitia penriba d'aeropuertos como La Coruña, Santiago o Santander, y mui cerca del de Bilbao".
    
El presidente recordó amás que "s'abren otres posibilidaes, porque Globalia ye'l primer grupu turísticu español, con una facturación añal de más de 4.000 millones d'euros, y una plantiya de 25.000 trabayadores, lo cual damos unes perspectives más p'allá de los vuelos porque puen ayudar a facer una promoción turística con otros aspectos yá integraos nesti grupu". Nesti sen, Hidalgo comprometióse a esforzase p'apoyar les polítiques turístiques del Gobierno asturianu "hasta onde podamos llegar", señalando la seriedá y solidez de la entidá.
  
"Rellacionámonos con un grupu que nun sólo tien aviones", añadió Areces, que recordó qu'Asturies notó menos el descensu del númberu de turistes nel 2009, con un descensu del 1,3% frente a más del 8% a nivel nacional.
    
Asina, mostró'l so deséu d'algamar con Globalia la potencialidá del destín turísticu asturianu, pa que'l sector despegue otra vez nel 2010.
 

Contador Estadistiques