Coleutivos del norte del Estáu piden la retirada del Plan d'Enerxía

L'Agrupación de Coleutivos Asturianos unvió al Ministeriu d'Industria la solicitú de nulidá del alcuerdu ministerial nel que s'aprobó la planificación de los sectores d'eletricidá y gas.

La iniciativa d'ACA apoyáronla güei n'Uviéu otros coleutivos del norte d'España, como l'Asociación Cántabra de Afectados por la Alta Tensión (Acaat) y el Movimiento Cívico contra Sama-Velilla (Lleón). Tamién cuenten cola solidaridá d'otres plataformes del País Vascu y d'Aragón.

Según señaló'l voceru de ACA, Domingo Goñi Tirapu, na rueda de prensa posterior a la xunta, si'l Ministeriu nun contesta nel plazu de dos meses, la so intención ye la de llegar a los Tribunales cola interposición d'un recursu contencioso-alministrativu pa la proteición de derechos fundamentales.
  
Goñi Tirapu solicita la nulidá al entender que'l Gobiernu d'Asturies realizó una estratexa enerxética d'espaldes a los ciudadanos, ensin nin siquier sometela a información pública. Esplicó que la so organización solicitó al Gobiernu esi documentu y que dende l'Executivu respondieron que nun lu atopaben.
  
Los coleutivos axuntaos güei n'Uviéu consideren que'l Plan Nacional d'Enerxía y Gas ta coxu y plantega grandes infraestructuras enerxétiques que nun se precisen. No que se refier a enerxíes renovables, esplicó que ye un aspeutu que se desmadró, xenerando un caos.
  
Asina, dixo que lo que tien de realizar el Ministeriu ye un plan nuevu, porque amás yá hai aspeutos que tán repercutiendo nel bolsu de los ciudadanos. Estos coleutivos tienen previstu axuntase con regularidá. El próximu alcuentru va tener llugar en Cantabria, onde van presentar otru documentu, amás de fórmules de movilización conxunta. L'oxetivu ye ayudar ente los movimientos cívicos de colectivos vecinos.