La SGAE recuerda-y al Puelles Rock que deben pagar drechos d'autor

La SGAE recordó-y a los organizadores del Puelles Rock que'l fechu de que l'eventu seya gratis, nun quier dicir que la entidá deba renunciar a los sos llabores de xestión de drechos.

La sociedá trató de responder nestos términos a les crítiques de los organizadores del eventu musical, l'asociación cultural Boides, acabante de recibir una citación xudicial pa un actu de conciliación el próximu ún de marzu, nel que la  SGAE va reclama-yos más de 14.000 euros polos derechos xeneraos demientres les ediciones 2005, 2006, 2007 y 2008 de la cita musical. El pasáu añu decidieron nun organizalu, dao que yá taba entamáu esti contenciosu, anque tovía nun conocíen la cifra demandada.

Los responsables del Puelles Rock argumenten que la entrada al eventu ye gratis, que los grupos nun cobraben (esceuto Dixebra, qu'actuó nel 2008) y que la mayor parte d'ellos nin siquier son miembros de la sociedá.
  
Nesti sen, "la SGAE desea recordar que'l fechu de qu'una actividá seya gratis pal públicu, o hasta que'l propiu artista o intérprete nun cobre pola so participación (por ser amateur o por otros motivos), nun obliga al autor del repertoriu a renunciar a los sos drechos, nin a la SAGE a dexar de facer la xestión nel so nome".
 
Estimación
  
Sobre'l fechu de que los grupos participantes nun seyan socios de la SGAE, la entidá xestora recuerda que'l cálculu de 14.300 euros ye una estimación. "Al nun disponer de conciliación trátase d'una estimación orientativa en base a precios de mercáu", confirmó. Nesti sen, destacó les "xestiones personales en baldre de la nuesa representante na zona y la nula respuesta a les nueses cartes informatives". "Tanto nes citaes cartes como na papeleta de conciliación, lo primero que se solicita ye'l programa y el presupuestu del eventu nes sos ediciones, información que siempre mos negó", añadió.
  
"Si la organización del Puelles Rock mos facilitare los presupuestos del festival y el repertoriu de les ediciones anteriores, la SGAE calcularía en base a ellos los drechos d'autor. Ye por ello que convidamos otra vuelta a la organización del Puelles Rock a que mos faiga llegar los presupuestos y fueyes de repertoriu de les ediciones de 2005, 2006, 2007 y 2008 d'esti festival. Tamos seguros de que, con diálogu y información, vamos solucionar el conflictu", señalen.