La Fiscalía Xeneral va investigar la estraición d'áridos n'El Musel

La Fiscalía Coordinadora de Mediu Ambiente y Urbanismu decidió axuntar información sobre les estraiciones d'áridos na bahía de Xixón pa determinar si esisten nicios penales.

Asina consta nun escritu unviáu per parte de la Fiscalía a Marcelino Laruelo Ruque, el particular que presentó yá n'agostu una denuncia énte'l Fiscal especial en materia de Mediu Ambiente n'Asturies, Joaquín de La Riva, poles estraiciones masives d'áridos del fondu marín del arenal xixonesa, con destín a los rellenos de les esplanaes y muelles de les obres d'ampliación d'El Musel.

Na comunicación, a la que tuvo accesu Europa Press y de fecha 3 de febreru, la Fiscalía Coordinadora de Mediu Ambiente y Urbanismu esplica que recibió un informe de De La Riva, onde esplicó que, dempués de l'acumulación nel Xulgáu d'Instrucción númberu 3 de Xixón de les socesives ampliaciones de la denuncia inicial formulada por Laruelo, aquel procedimientu xudicial sigue sobreseído provisionalmente.
  
Asina, al nun esistir procedimientu xudicial abiertu, ye la mesma Fiscalía la que decidió interesase pol asuntu y ver si esisten nicios de relevancia penal.
  
Según esplicó'l mesmu Laruelo Ruque, la denuncia presentada énte la Fiscalía referíase a la posible nulidá del estudiu y posterior declaración d'impactu ambiental qu'amparen les estracciones d'áridos na bahía xixonesa con destín a rellenos na obra d'ampliación d'El Musel, al considerar que nun se puede presentar como dragáu lo qu'en realidá ye una esplotación minera somarina, onde la única finalidá ye llograr materiales pa dichos rellenos.
  
Tamién se punxo en conocencia de la Fiscalía de Mediu Ambiente y Urbanismu la negativa de l'Autoridá Portuaria de Xixón a dexar al interesáu consultar los espedientes rellacionaos con dichu Estudiu y Declaración d'Impactu Ambiental, lo cual nun sólo ye yá bien significativo, sinón que contravién lo zxustao na Llei 27/2006, d'accesu a la información y participación, en materia de mediu ambiente.