Presenten una propuesta na Xunta pa buscar alternatives a la incineradora

Cuarenta asociaciones cíviques piden al Parllamentu que se constituya una comisión na que participe la sociedá pa buscar una solución alternativa a la incineradora de Coxersa. 

La propuesta presentáronla güei representantes de dalgunos de los coleutivos promotores, como ye'l casu de la Unión de Consumidores, UCE Asturies, l'Asociación pa la defensa de la Sanidá Asturiana, Ecoloxistes n'Acción y la Confederación d'asociaciones de Vecinos d'Asturies, Cavastur.

El presidente de UCE, Dacio Alonso, esplicó que se fai necesario buscar una solución a los residuos que cuente con un francu consensu y pautu sociopolíticu a partir de cuatro premises básiques. La primer d'elles ye que se dea cumplimientu a los oxetivos máximos de reciclaxe de residuos d'envases establecida na normativa vixente pal 2008. Amás consideren que tien de dase cumplimientu a los oxetivos del aumentu del compostaxe y la biometanización de la fraición orgánica de los residuos domésticos.
  
Otra de les premises a cumplir ye que se tome l'alcuerdu d'ellaborar un estudiu d'evaluación de los sistemes municipales de recoyida selectiva al envís d'impulsar la so eficiencia y a lo último que se dea l'alcuerdu pa un estudiu del impactu ambiental de les distintes alternatives pal tratamientu de los residuos domésticos non recuperables, esto ye, la llamada fraición restu.
  
Dacio Alonso afirmó que se trata d'un problema complexu, polo que la solución nun puede ser cenciella y consideró "demagoxa y engañu" que se quiera tresmitir a los ciudadanos que la incineración ye la única solución y la meyor.
    
"Nun se trata de dicir incineradora sí o incineradora non. Trátase de dicir qu'hai alternatives, que tamos dispuestos a estudiales y proponeles, polo que la sociedá nun acepta que se mos diga que la incineración ye la única solución", dixo Alonso, qu'añadió que nun se puede almitir que se diga que l'alderique ta zarráu.  
   Nesti sen el presidente de Cavastur, Vicente Gutiérrez, indicó que la decisión sobre la futura xestión de los residuos nun se pue tomar namás dende un órganu como Coxersa y destacó'l malestar y la preocupación qu'hai ente la ciudadanía.
    
Por ello reclamó que se dexe participar y que s'escuche a la sociedá civil antes de tomar una decisión. "Hai que dicir a los políticos que nós tamién tenemos alternatives y que tienen d'escuchanos", dixo.
    
El representante d'Ecoloxistes n'Aición, Paco Ramos, indicó que l'alderique sobre la xestión residuos desarrolláu nel 2003 foi frutu de la presión social y celebróse con una decisión yá tomada, polo que nun se trató d'un alderique abiertu. "Entamóse un alderique nel que Coxersa axustó a una serie de ponentes pa defender una decisión que yá teníen tomada", dixo Ramos.
    
Pela so parte, el representante de l'Asociación pa la defensa de la sanidá pública n'Asturies, Carlos Ponte, manifestó que dende'l puntu de vista sanitariu "faise necesario buscar una alternativa a la incineración porque aseguró que son de sobra conocíes y llargamente demostraes les negatives consecuencies de la incineración pa la salú".