¿Y el "público" d'Asturies?

11 Febreru, 2010 por Damián Barreiro

Damián Barreiro's blog
Inicie sesión o rexístrese pa espublizar comentarios

Taxonomy upgrade extras:

El próximu 23 d’abril, día del llibru y de San Xurde, San Jordi en Cataluña, esta comunidá celebra’l so patrón con un día d’esaltación de la so cultura, siendo un vezu’l regalar un llibru a los homes y una rosa a les muyeres. Esi día tan señaláu, el diariu “Público” va llanzar a les cais catalanes un cuadernu diariu de 12 páxines dafechu na llingua de Ramón Llul. Según los sos responsables, quieren dar una nueva güeyada sobre Cataluña y que los llectores perciban el diariu como propiu al traviés de la llingua.

Mientres, dende’l pasáu llunes, los asturianos qu’acuden al quioscu pudieron ver como nel nuesu país, l'históricu diariu “La Voz de Asturias” viéndese xunto “Público”. El motivu ye la compra del periódicu asturianu pol madrilanu. Una operación que reduxo la plantiya de la excabecera del Grupo Zeta de 66 trabayadores a unos 25, un ERE qu’afeutó al 66% de los trabayadores.

Bien ye verdá que’l periódicu asturianu fundáu en 1923 rexistró l’añu pasáu unes perdes de 1,5 millones, según l’Asociación de la Prensa de Madrid, y qu’añu tres añu diba amenorgando’l so númberu de llectores. Sicasí, ye difícil d’imaxinar como una ventena de trabayadores van da-y viabilidá a un proyeutu del qu’enantes s’encargaben más de sesenta.

Pel momentu, “Público” asegura que va mantener la histórica cabecera asturiana, anque afitó pa la compra l’ERE. Ta por ver si los nuevos propietarios darán-y una vuelta a la llinia editorial de “La Voz de Asturies” p’averala a la del diariu madrilanu, muncho más progresista, llaica, reivindicadora de la memoria histórica, republicana, con ún de los diseños más modernos de la prensa española, buscando siempre’l llector más mozu ya, inclús, dando-y ecu a les minoríes llingüístiques, como pue vese nel fechu d’espublizar una edición en catalán

Habrá qu’esperar pa ver si les manifestaciones pro-oficialidá salen en portada o na tercer páxina de cultura o si les voces de les minoríes o les muestres artístiques alloñaes de Llaborales o Niemeyers se recueyen ente les sos páxines

Comentarios

El despistau wrote on 2 Mayu, 2010:

Fai una selmana qu'envié esta carta, vía corréu a Público y a la Voz de Asturias y hasta la fecha nun la publicaron.
LA VOZ DE PÚBLICO

Soi un llector del diariu Público dende qu’apaeció nel escenariu de la prensa. Tengo que dicir al respective que me presta la llinia editorial, los conteníos y el tratamientu seriu y comprometíu que se da a la información y a les noticies.
Cuando hai unos meses m’enteré de que la editora qu’espubliza esti diariu diba facese cola cabecera de La Voz de Asturias sentí una alegría grande y dixi pa min: a la fin vamos tener un diariu nuevu que va trayer aire fresco al nuesu país. Avezáu yá, gracies a Público, a otru tipu de periodismu, comprometíu y plural, onde les minoríes tamién tienen sitiu, pensé que La Voz de Asturias, no referente a Asturies, diba siguir una llinia asemeyada.
Nel actu d’inauguración y presentación de la cabecera nueva n’Uviéu, onde deberíen tar presentes toles “fuercies vives” de la Comunidá, la presencia de persones representatives del mundiu políticu, académicu, cultural, artísticu, musical, etc. comprometíu col asturianismu, y de manera especial cola llingua asturiana, foi nulu. Lo que yá badagüeyaba un mal empiezu.
A midida que foi pasando’l tiempu los malos presaxos foron confirmándose, y a día de güei tenemos un periódicu más, que diz coses asemeyaes y d’una manera paecida al restu de la prensa que se fai n’Asturies.
L’editorial, les noticies, los columnistes y en xeneral el periódicu en conxuntu sigue dando a tolo que tien que ver cola cultura y la sociedá asturiana un tratamientu mui poco plural, acomplexáu y nada comprometíu. Ye significativu’l pocu espaciu que se dedica a la nuesa llingua nes páxines del diariu. Esperábemos que l’espíritu alternativu, críticu, comprometíu colos movimientos sociales, coles espresiones alternatives, coles ideoloxíes non complacientes se contaxare de Público a La Voz de Asturias. Foi pasando’l tiempu y nun vemos que se vaya nesi sen. Nun hai gotu de garra, nin de trabayu por reflexar l’Asturies non combayona, participativa ya inquieta, que la hai y que mos interesa. Sobren sitios onde lleer los “argumentos” de los de siempre.
Cónstame que la mayoría de les persones que lleen Público (qu’agora lleen tamién La Voz de Asturias) participa en mayor o menor midida conmigo nesta crítica. Pue ser que nun síamos una mayoría social, pero’l sector de xente que mos identificamos con Público esperábemos que la versión asturiana reflexare la mesma llinia editorial. Queremos más mercar y lleer Público qu’otros periódicos estatales, pero nun alcontramos razones pa lleer La Voz en cuenta de cualquier otru periódicu editáu n’Asturies. De momentu vamos siguir aguardando’l cambéu.