La llei del aranés pasa'l tramite parllamentariu col refugu del PP

|

El Parllamentu catalán refugó esti miércoles la enmienda del PP contra'l proyeutu de llei del aranés, que quier fomentar y protexer esta llingua y garantizar el drechu a usala.

El vicepresidente de la Generalitat, Josep Lluís Carod-Rovira, nuna intervención dafechu n’aranés, solliñó'l calter históricu de la llei, porque per primer vegada na hestoria moderna regúlase'l fomentu, la defensa y la protección del aranés. Defendió, amás, que la llei ye un exerciciu de coherencia nel marcu d'una política llingüística que defende la pluralidá y la salvaguarda de les llingües propies del país.
 
La tramitación de la llei vien en plenu alderique en Cataluña de la nueva dixebra territorial por comarques, la “llei de vegueríes” que va desaniciar les actuales provincies y que nun reconoz al Valle d’Arán como un distritu propiu, inxertándolo nel Altu Pirinéu, provocando’l malestar n’Unitat d’Arán, que gobiernen nel Conseyu Xeneral d’Arán y que se presenten en coalición col PSC.
 
El diputáu del PPC, Rafael López, que tamién fixo parte de la so intervención n’aranés, señaló que los populares tamién quieren fomentar l’aranés, pero añadió qu'hai que protexer tamién el trillingüismu d’Arán, considerando que cola llei s’abre la puerta a la imposición.
 
Mientres que’l Síndicu d’Arán (xefe del gobiernu comarcal) y diputáu del PSC, Francesc Boya,  reprochó al PP falta de sensibilidá. Pa él, lo que ta en riesgu nun ye'l trillingüismu, sinón l’aranés. Boya dixo que la llucha d’Arán y l’aranés ye tamién la llucha de Cataluña y la llingua catalana. Amás reclamó un nuevu relatu identitariu, territorial y llingüísticu de Cataluña y Arán “dende la pluralidá y el respetu por asegurar el proyeutu compartíu de dambos pueblos”..
 
Arán ye l'únicu territoriu occitanu que tien reconocida y agora va tener regulada una llingua falada por tres millones d'habitantes d’Arán, l'Estáu francés y l'italianu. La llei va reconocer la unidá de la llingua occitana, de la que forma parte l'aranés. Cola norma qu'agora se tramita, la conocencia del aranés va ser un méritu pa optar a puestos de trabayu públicos y esta llingua va ser la vehicular de la escuela pública. Amás, reconoz el drechu a dirixise a les alministraciones de la Generalitat nesta llingua.

Contador Estadistiques