Piden la realmisión de Pepe El Ferreiro

La Plataforma d’Apoyu a Pepe El Ferreiro organiza una concentración énte Presidencia. Mientres qu’en Degaña, IU, PP y PSOE aprobaron una moción onde piden la so realmisión.

La Plataforma pretenden treslladar la rocea de la sociedá civil a les entidaes competentes, y ser cauce de la preocupación ciudadana pol futuru del Muséu de Grandas de Salime ensin el so direutor y fundador.
 
De la mesma manera, aseguren que cursaron les solicitúes formales de realmisión de Naveiras nel so puestu, que se presentaron al Consorciu pa la Xestión del Muséu, y a los miembros del mesmu de manera individual. Amás, solicitóse una investigación al Defensor del Pueblu pa que supervise les decisiones tomaes pol Consorciu de Xestión del Muséu.
 
La concentración ye a les 19.30 hores d’esta tarde, delantre de la sede de Presidencia n’Uviéu.
 
IU, PP y PSOE xuntos por El Ferreiro en Degaña
 
El Conceyu de Degaña aprobó ayeri una moción, colos votos favorables d'IU, PSOE y PP na que solicita al Principáu'l reestablecimientu de José Naveiras como director del Muséu Etnográficu de Grandas de Salime.
  
D'esta manera, nel últimu plenu estraordinariu, salió alantre la moción plantegada por IU. Sólo un conceyal independiente astúvose, al entender que nun tenía información bastante. El restu apoyáronla.
  
 "Lo que-y ficieron a 'Pepe El Ferreiro' nun tien nome", insistió l'alcalde, Jaime Gareth, que reclamó al Gobiernu d'Asturies que lu reestableza nel so puestu. Añadió que la votación de güei espeya'l "clamor popular" pa que 'Pepe el Ferreiro' vuelva ocupar el so cargu.