ASBRU quier qu’Areces trabaye por caltener los vuelos con Bruxeles

L’Asociación d’Asturianos en Bruxeles unvió una carta al presidente del Principáu pa encamenta-y que trabaye pol restablecimientu de los vuelos cola capital europea.

Depués de qu’Air Nostrum anunciare la supresión del 75% de los conexones aérees ente Asturies y Bruxeles, ASBRU, que tienen 300 socios, quier que’l restablecimientu de vuelos regulares y con periocidá diaria seya una de les prioridaes del executivu en materia de comunicaciones.
 
Señalen que saben qu’esto ye una decisión empresarial que nun ye del Executivu, pero “nuna Europa cada vez más integrada, tan importante como l’Autovía del Cantábricu, el Musel o’l tren d’Alta Velocidá, ye tener unas conexones aérees mínimes que nos averen a los centros de decisión económica y política”.
 
Poro, encamienten al Principáu a crear el marcu afayadizu pa que les comunicaciones d’Asturies meyoren en tolos niveles, yá que consideren qu’ Asturies, ta alloñándose de centros de decisión políticos y económicos “tan relevantes como Bruxeles o Londres, llindando les sos posibilidaes d’asitiase como destín del turismu internacional”.
 
Señalen que Bruxeles ye en un “hub” políticu y empresarial fundamental. Amás de ser casa d’una gran comunidá d’asturianos, “unos 16.000”, y como capital de la UE ye l’orixe del 80% de la llexislación que s’aplica n’Asturies, “asina como fonte d’una gran parte de la so financiación”. Rescamplen la importancia de la capital europea tres la entrada en vigor del Tratáu de Lisboa, qu’aumenta les competencies de la UE y la so influyencia na nuestra vida cotidiana”.
 
Dende ASBRU faen un llamáu, anque señalen qu’Areces ye’l principal destinatariu, a tola sociedá asturiana, sobre too a partíos políticos y axente sociales, “pa qu’acullá d’intereses partidistes, emburrien pa qu’Asturies cuente coles conexones aérees afayadices p’avanzar nel so progresu económicu y social”.