Migoya califica a Ovidio Sánchez de "fracasáu políticu"

La conseyera d'Alministraciones Públiques tachó de "fracasáu" a Ovidio Sánchez, al tiempu que defendió la xestión d'Areces, que conllevaron el qu'Asturies seya una rexón "más moderna".

Asina lo dixo en Xixón tres participar nos actos de celebración del Día d'Internet Seguru nel Acuariu, en respuesta a les crítiques de Sánchez, qu'atribuyó'l cambiu de candidatu del PSOE nes próximes eleiciones autonómiques a la difícil situación que vive'l país poles polítiques d'Areces. Migoya insistió en que Sánchez "fracasó siempre en tolos sos oxetivos dende'l puntu de vista políticu".
 
Na so opinión, lo que'l cabezaleru 'popular' trata de facer ye "confundir". A la escontra, aseguró que'l Principáu tien "mui clara" la so actuación nun contestu de crisis y añadió que'l Gobiernu aplicó mecanismos y midíes pa responder a la situación y amenorgar los efectos más negativos xeneraos pola mesma "dientro de les capacidaes d'un gobiernu".
  
Nesti sen, matizó que los datos económicos apunten a que les coses se ficieron bien y qu'esta comunidá yá nun tien los problemes d'enantia, qu'amás yeren "de mui difícil superación". "Ye más moderna, meyor preparada, con más posibilidaes pa poder superar les dificultaes", afirmó.