De Lorenzo defende que Cascos diba ser un bon candidatu "pa lo que seya"

L'alcalde d'Uviéu dixo qu'Álvarez-Cascos yera un bon candidatu "pa lo que seya" y encamentó, igual que'l presidente del PP, Ovidio Sánchez, a esperar al mes de setiembre.

"Cascos tien más pesu que'l señor Zapatero y que tol so equipu de ministros xuntos, ¿nun va ser un bon candidatu pa lo que seya?", indicó en declaraciones a los periodistes enantes de la presentación del menú d'Antroxu.
 
De Lorenzo consideró amás que los socialistes "tienen total autoridá pa nomar al so candidatu cuando-yos paeza". "Paez qu'hubo prieses pero son mui dueños", señaló. De la mesma manera, esclaró que'l PP nun ye un partíu "asambleariu" y cuando fala Ovidio Sánchez failo "el presidente rexonal".
  
El presidente del PP d'Asturies esplicó ayeri tres el conceyu del Comité rexonal que los procesos pa la eleición de candidatos entamarán "de magar el branu" y, en rellación a Cascos, comentó que "hai candidatos con una trayectoria que sobrepasa a la propia Asturies".