Día del Llibru Asturianu

Eustaquio Revilla: Espertu en museoloxía

Alberto Álvarez Peña's picture
Taxonomy upgrade extras: 

Diz don Eustaquio, alcalde hasta agora de Grandas de Salime, que’l cese de Pepe El Ferreiro nun tien motivaciones polítiques y apunta foínamente irregularidaes económiques. Sí, ye verdá, Pepe El Ferreiro taba faciendo les veces de direutor del Muséu pero cobrando como si fuere un bedel.
 
Tamién diz, que taba faciendo de les instalaciones del Muséu'l so propiu “apartamentu”. Que yo sepa tolos direutores tienen un despachu onde trabayen, pero equí'l que s’equivoca ye’l señor Eustaquio, el que fizo del Muséu el so apartamentu fui yo, d’esto fai yá venti años, porque tuve que dormir nel horru del Muséu, hasta que Pepe dispuso d’una habitación na so propia casa onde abellugame’l tiempu que fizo falta, mientres yo dibuxaba una catalogación tipolóxica de la coleición de madreñes que Canteli cedió a Pepe El Ferreiro pal Muséu de Grandas. Sí, ye irregular que’l direutor d’un muséu tenga que dar comida y agospiu a un dibuxante especializáu na etnografía porque l’Alministración nun lo fai, nun había presupuestu.
 
L’especialista en museoloxía don Eustaquio Revilla diz que’l Muséu ye un sitiu mui peligrosu, ensin salides d’emerxencia, planes d’accesibilidá, etc... Nun tengo alcordanza de ver tales coses nos museos de Porrúa, Pueblu d’Asturies de Xixón, Muséu de Quirós, etc... ¿Tamién van querer cesalos a toos?. Claro que si’l señor Eustaquio quier traducir eso por barandielles d’aluminiu, metracrilatu, puertes de cristal, etc., los arquiteutos del réxime tienen esperiencia estrozando casones, palacios o ilesies, “rehabilitando” con aires de fata “modernidá”.
 
Tamién ye irregular que’l direutor d’un muséu seya’l que coles sos propies manes igüe pieces, trabaye la piedra, la madera, o forxe’l fierru, cosa que nun cuento que pueda facer el nuevu sustitutu, que llega ensin concursu oposición recomendáu por Carmen Fernández Ochoa, arqueóloga mui afín al presidente Vicente Alberto Álvarez Areces. Francisco Cuesta Toribio yá pocu s’alcuerda de cuando xunto con José Luis Maya, braeru alma mater de la escavación del castru de la Campa Torres de Xixón, tuvo que sufrir el dispreciu y la presión d’abondos colegues de profesión. Güei del fallecíu José Luis Maya naide quier alcordase. Diz que’l Muséu ye pocu menos qu’un almacén y que nun collaboraba con otros museos. Yo alcuérdome de ver pieces cedíes pa esposiciones temporales –La Industria del Fierru o Los Vieyos Telares nel Pueblu d’Asturies de Xixón-.
 
Nel muséu de Grandas facíase vinu y país (oruxu) col que dempués convidábase a los visitantes, preparóse’l llin, diéronse cursos de telar, de torno de media volta... ¿acasu nun yera un muséu vivu?. Pero préstame l’afán de catalogar les pieces por dalguién que desconoz el nome de los preseos, porque desconoz la fala. ¿Cómo catalogará un sedelo, una garmalleira, una mazadeira, o una trapela?; nun duldo yo de la so capacidá pa estremar una fíbula auccisa d’una febiella d’omega pero...
 
Tamién desconoz que tolos grandaleses tienen entrada gratuita nel Muséu asina que lo de “a partir de ahora la entrada como usuario y pagando” nun va poder ser.
 
En fin, don Eustaquio podría asesorar cola so esperiencia a Carmen Fernández Ochoa, coordinadora del Muséu Arqueolóxicu que tamién tien munches irregularidaes. ¡Haxa salú! y que nun tenga que gastar el sueldu n’aspirines.

Comentarios

Norabona pol artículu.
Si esti casu yá nos paez mafiosu, inxustu y sangrante pa los "profanos", pa los que conocen de primer mano l'asuntu tien de ser incomprensible. Por ello espero que sigan apurriéndose más datos como estos que pongan inda más n'evidencia al gobiernu del principáu, al tiempu que nos dan más razones p'axuntanos a la causa de Pepe El Ferreiro.

Este señor, Berto Peña, é un experto en mentir, sempre el fizo. Agora resulta que os Belenos del que el forma parte nunca apoiaron a Maya e a Cuesta contra outros arqueólogos. Enfin!!! Ver pra crer. Dicir que Carmen Fernández Ochoa recomendou a Cuesta é rotundamente FALSO e que poña úa sola proba enriba da mesa. E se existen irregularidades nel Arqueolóxico que vaia aos tribunais e el denuncie e senón caladín estase mellor, porque na súa casa pode existir muito cuito, como muitos dos plaxios dos sous libros. Pra defender al Ferreiro nun se necesita botar merda a outra xente.

Cuando los galleguistes tais colos españolistes daqué malu tengo que pensar... y daqué malu ye pa Asturies de xuru.

El malo es tu, que vés aquí cúa teoría estúpida, é como se dixese eu que el asturianismo é úa quinta columna del españolismo, peró non lo vou dicir. Aí tá a diferencia. El malo pra Asturias son xente como tu, puro veleno.

¡ehí che vi!

Contador Estadistiques